АҚШнинг Арканзас штатида яшовчи фуқаро лотереяда 1 миллиард 817 миллион доллар ютиб олди. Бу АҚШ тарихидаги иккинчи энг йирик ютуқ ҳисобланади. Бу ҳақда бугун, 26 декабрь куни ABC News хабар берди.
Нашрнинг ёзишича, америкалик эркак Powerball лотерея чиптасини сотиб олиб, Рождество кунги тиражда 4, 25, 31, 52 va 59 рақамларини танлаган. Айнан шу рақамлар ютуқли бўлиб чиққан.
Энди ғолиб икки вариантдан бирини танлаши мумкин: 834,9 миллион долларни бирйўла нақд пул кўринишида олиш ёки бутун ютуқ суммасини 30 йил давомида ойлик тўловлар шаклида қабул қилиш.
Бу жекпот жорий йилда миллиард доллардан ошган иккинчи ютуқ бўлди. Сентябрь ойида Powerball лотереясида иккита чипта жами 1,787 миллиард доллар ютган – бу АҚШ лотереялари тарихидаги учинчи энг катта соврин ҳисобланади. Powerball маълумотларига кўра, жекпотни ютиш эҳтимоли 292 миллиондан 1 га тенг.
Рекорд 2022 йилда ўрнатилган бўлиб, ўшанда Калифорния штати фуқароси Эдвин Кастро 2,04 миллиард доллар ютиб олиб, Гиннеснинг рекордлар китобига кирган. Кастро ютуқни 997,6 миллион доллар миқдорида бирйўла олишни танлаган va бир йил ичида Лос-Анжелесда бир нечта ҳашаматли уй сотиб олган. Энг қиммат уйи 47 миллион долларга тушган.
