Россияда онаси томонидан ташлаб кетилган янги туғилган чақалоқ Ўзбекистонга қайтарилди. Бу ҳақда “Дунё” ахборот агентлиги хабар берди.
Қайд этилишича, Ўзбекистоннинг Екатеринбург шаҳридаги Бош консулхонасига Свердловск шаҳридаги 1-шаҳар болалар клиникаси вакиллари Ўзбекистон фуқароси Х.С. ўз боласини ташлаб қочиб кетгани хусусида мурожаат қилган. Маълум бўлишича, она аввалроқ шифокорларга жуда заиф туғилган va махсус вакуумга жойлаштирилган чақалоғидан воз кечишини айтган. Орадан 3 кун ўтганидан сўнг у гўдагини ташлаб, ўзи шифохонадан чиқиб кетган.
Дипломатлар онани топиб, у билан болани ватанга қайтариш зарурлиги ҳақида профилактик суҳбат ўтказган. Улар болани рўйхатдан ўтказган, она va чақалоққа барча зарур ҳужжатларни бепул расмийлаштирган. Россиянинг ушбу минтақасида тадбиркорлик билан шуғулланаётган ватандошлар кўмагида клиника тиббий хизматлари тўлови ҳал қилинган.
Ўзбекистон Миграция жамғармаси маблағлари ҳисобидан она va болага “Екатеринбург-Тошкент” йўналиши бўйича чипталар харид қилиниб, Ўзбекистонга қайтиши учун рейсга кузатилган.
