Ўзбекистондаги тиббиёт олийгоҳларига талабаларни суперконтракт асосида қабул қилиш бекор қилинади. Бу ҳақда Соғлиқни сақлаш вазирлиги томонидан жамоатчилик муҳокамасига қўйилган қарор лойиҳасида кўзда тутилган.
Унга кўра, тиббиёт соҳасида кадрлар тайёрловчи олий таълим ташкилотларида бакалавриат таълим йўналишларида оширилган тўлов-контракт асосида талабаликка қабул қилиш тартиби 2026/2027-ўқув йилидан бошлаб бекор қилиш режалаштирилган.
Ушбу ўқув йилидан бошлаб тиббиёт ОТМларида “даволаш иши” ва “педиатрия иши” бакалавр таълим йўналишлари негизида 5+1 шаклидаги “умумий тиббиёт” бўйича 6 йиллик йўналиш жорий этилади. Ушбу йўналиш битирувчилари оилавий шифокор мутахассислигига эга бўлади.
2027 йил 1 январдан бошлаб бакалавриат йўналиши, резидентура (клиник ординатура) ва магистратура мутахассисликлари бўйича умумий ўқиш даврининг камида 50 фоизини давлат гранти асосида битирган ҳамда махсус имтиҳондан муваффақиятли ўтган талабалар учун давлат тиббиёт муассасаларида қуйидаги муддатларда мажбурий ишлаб бериш тартиби жорий этилади:
- Қорақалпоғистон Республикаси ва вилоятлардаги бирламчи тиббий-санитария ёрдами муассасаларида – камида 1 500 иш соати;
- туман (шаҳар) даражасидаги (Тошкент шаҳри бундан мустасно) бошқа даволаш-профилактика муассасалари ҳамда тиббиёт соҳасидаги давлат бошқарув органларида – камида 2 000 иш соати;
- Қорақалпоғистон Республикаси ва вилоятлар даражасидаги даволаш-профилактика муассасалари ҳамда тиббиёт соҳасидаги давлат бошқарув органларида – камида 2 500 иш соати;
- Тошкент шаҳри ва республика даражасидаги даволаш-профилактика муассасалари ҳамда тиббиёт соҳасидаги давлат бошқарув органларида – камида 3 000 иш соати.
Бакалавриат, резидентура ва магистратура мутахассисликлари ҳар бир ўқув модулининг академик кўрсаткичларини ўзлаштиришда, шунингдек давлат имтиҳонларида минимал ўтиш баллари шифокор мутахассисликлари учун 70 фоиз, ўрта тиббий ходим мутахассисликлари учун 60 фоиз этиб белгиланади.
