Украина дронлари Wildberries компаниясининг Санкт Петербург ва Ленинград вилоятидаги омборларига ҳужум қилди. Бу ҳақда Meduza хабар берди.
Ленинград вилояти губернатори Александр Дрозденко ҳужум оқибатида омборда ёнғин бошланганини тасдиқлади. Объект Новосаратовка қишлоғида жойлашган. Дрон ҳужумлари оқибатида уч киши жароҳатланган, улар ўртача оғир аҳволда шифохонага ётқизилган.
Шушаридаги омбор 2024 йилда ёниб кетган омборнинг айнан ўзи бўлиб, ўшанда компания сотувчиларга 35 миллиард рубль товон тўлаган эди. Кейинчалик объект 2025 йил ёзда қайта ишга туширилганди.
Санкт Петербург губернатори Александр Беглов эса Москва шоссесидаги фуқаролик инфратузилмаси объектлари ҳужумга учраганини айтди. У “оқибатларни бартараф этиш” ишлари олиб борилаётганини таъкидлади. Аммо бошқа тафсилотларни келтирмади. Wildberries матбуот хизмати Шушари ва “Уткина завод”даги омборлар фаолияти вақтинча тўхтатилганини маълум қилди.
Telegram каналлари Симферополдаги WB омбори ҳам Украина дронлари ҳужумига учраганини хабар қилди. Маркетплейс матбуот хизматининг таъкидлашича, компаниянинг аннексия қилинган Симферополдаги саралаш маркази “хавфсизлик талабларига мувофиқ эвакуация қилинган”.
