Қозоғистонда россияпараст блогер Аслан Тўлегенов суд ҳукми билан уч йил-у тўққиз ойга озодликдан маҳрум этилди. Бу ҳақда Orda.kz хабар берди.
Блогер миллатлараро нифоқни қўзғатиш ва ёлғон маълумот тарқатишда айбдор деб топилди.
“YouTube’да канал муаллифи ва администратори бўлган Т. экспертлар хулосасига кўра, миллатлараро адоватни қўзғатишга қаратилган видеороликларни жойлаган ва эълон қилган. Бундан ташқари, у атайлаб ёлғон маълумот тарқатган”, дея тушунтирди суд.
Блогернинг ўзи айбни тан олган. Суд қарорига кўра, у энди қарийб тўрт йилни колонияда ўтказади.
Аслан Тўлегенов интернетда Nordkazakh(Шимолий қозоқ) тахаллуси билан фаолият юритади. Унинг YouTube’даги аудиторияси 180 минг обуначидан ошади. “Шимолий қозоқ” ўзининг провокацион чиқишлари билан машҳур. Кўпинча у Россиянинг Украинага қарши босқинини қўллаб-қувватловчи видеолар чиқарган.
Видеолардан бирида Тўлегенов “ҳамма нарса: илм, билим, фаровонлик, санъат русларники” дея даъво қилган. Блогернинг иддаосига кўра, россияликлар туфайли қозоқлар “даштда ҳукм сурган тотал жаҳолат”дан қутулишга муваффақ бўлган.
