АҚШ Руминияга Abrams танклари билан жиҳозланган бўлинмани юборишга қарор қилди. Бу ҳақда Руминия мудофаа штаби бошлиғи генерал Георгице Влад маълум қилди.
Генералнинг сўзларига кўра, бўлинмани ротация асосида жойлаштириш АҚШнинг мамлакатдаги одатий иштирокининг бир қисми ҳисобланади. Бу қўшинларнинг умумий сонини оширишни англатмайди. Руминияга олиб келинадиган танклар сони аниқ эмас. Бироқ мамлакат Қуролли кучлари эҳтиёжи учун 54 та Abrams танкини сотиб олмоқда.
”Қўшма Штатлар кучларини аввалги даражада сақлаб қолишга ва Руминияда жойлаштирилган кучларнинг сифати ҳамда зарба бериш салоҳиятини оширишга рози бўлди. Бунинг энг яхши мисоли — Abrams танклари билан жиҳозланган америкалик аскарлар бўлинмасининг жойлаштирилишидир”, деди Влад.
Бу қарор НАТОнинг Европадаги бирлашган кучлари қўмондонлиги билан маслаҳатлашувлардан сўнг қабул қилинган. 2025 йил октябрь ойида АҚШ Руминиядаги ҳарбий иштирокини қисқартиришини эълон қилиб, ротация бригадаси батальонларидан бирини олиб чиққан эди.
Бироқ мамлакатда мингга яқин америкалик ҳарбий хизматчи қолмоқда. НАТОнинг бошқа давлатлари контингентлари билан биргаликда Руминиядаги иттифоқчи қўшинлар сони тахминан 3,5 минг кишини ташкил этади. Руминиядаги альянс базаларидан бирида 2026 йил январидан йирик логистика маркази иш бошлайди. Ушбу марказ Украинага қурол-яроғ етказиб беришни мувофиқлаштириш билан шуғулланади.
Abrams М1 — Америка Қўшма Штатларининг асосий жанговар танки. У АҚШ билан бир қаторда Кувайт, Саудия Арабистони, Миср, Ироқ ва Австралия қуролли кучлари хизматида ҳам қўлланилади. Техника 1980 йилда серияли ишлаб чиқарилган ва ўз номини Вьетнамдаги Америка гуруҳининг қўмондони бўлган америкалик генерал Крейтон Абрамс шарафига олган. Танк энг замонавий ўт очишни бошқариш тизимларидан бири билан жиҳозланган. Ҳозирги вақтда Abrams дунёдаги энг оғир танклардан бири ҳисобланади. Унинг замонавий вариантлари 60 тоннадан ошади.
