АҚШ президенти Дональд Трампга 2024 йил голф клубида суиқасд қилишга уринган Райан Раут умрбод қамоқ жазосига ҳукм қилинди. Бу ҳақда BBC хабар берди.
59 ёшли Раут 2025-йилда президентликка номзод бўлган Трампни ўлдиришга уринишда айбдор деб топилган эди. Ҳодиса вақтида ҳудудда бўлган АҚШ Махфий хизмати ходими буталар орасидан милтиқнинг учи чиқиб турганини пайқаб, Раут томон ўқ узган. Шундан сўнг эркак воқеа жойидан қочган, бироқ яқин атрофда қўлга олинган.
Судья Эйлин Кеннон ҳукм чиқариш тўғрисидаги меморандумда Раутнинг жиноятлари “шубҳасиз, умрбод қамоқ жазосига лойиқ” деб айтди.
“У бир неча ой давомида президентлик учун асосий номзодга суиқасд қилиш чораларини кўрган, йўлида ким бўлса ҳам, ўлдиришга тайёрлигини кўрсатган ва ҳозиргача жабрланганларга нисбатан на афсус, на пушаймонлик билдирган”, деди у.
Раутнинг адвокати Мартин Росс ҳукм бўйича апелляция берилишини айтди. Эркакнинг ўзи айбдорлигини тан олмаган. Шимолий Каролинада туғилиб, ҳибсга олинмасидан аввал Гавайида яшаган Раут суд мажлисларида бир неча бор ғалати хатти-ҳаракатлар қилган. Жумладан, у Трампни голф ўйнашга чорлаган, шунингдек, Адолф Гитлер ва Россия президенти Владимир Путинни тилга олган.
Уни айбдор деб топишганидан сўнг, Раут ручка билан бўйнига санчиб, ўзига шикаст етказишга уринган. АҚШ маршал ходимлари уни дарҳол суд залидан олиб чиқиб кетган. Федерал агентлар суиқасдга уриниш вақтида Раут Трампни аниқ кўра оладиган ҳолатда бўлмаганини айтди. Бироқ у яширинган жойдан кейинчалик ярим автоматик милтиқ топилган.
Флорида штатидаги ушбу ҳодиса 2024-йилда Трампга қарши амалга оширилган иккинчи суиқасдга уриниш бўлди. Биринчи ҳолат июль ойида Пенсилвания штатининг Бутлер шаҳрида сайловолди митинги вақтида содир бўлган. Ўшанда қуролланган шахснинг ҳужуми оқибатида бир киши ҳалок бўлган, бир неча киши, жумладан, Трамп ҳам жароҳат олган. Кейинчалик отишмани амалга оширган шахс 20 ёшли Томас Крукс экани аниқланган ва у воқеа жойида ҳуқуқ-тартибот идоралари ходимлари томонидан ўлдирилган.
