Кеча, 11 февраль куни Исроил Бош вазири Биньямин Нетаньяху Вашингтонга ташрифидан сўнг АҚШ Президенти Дональд Трамп томонидан ташкил этилган “Тинчлик кенгаши”га қўшилганини маълум қилди. Бу ҳақда у ўзининг Х ижтимоий тармоғидаги саҳифасида ёзди.
Нетаньяху АҚШга ташрифи давомида Дональд Трамп ва Давлат котиби Марко Рубио билан учрашган. Учрашувдан сўнг Исроил “Тинчлик кенгаши” аъзосига айланганини тасдиқлаган.
Қайд этиш жоиз, Трампнинг режасига кўра, янги кенгаш Ғазонинг вақтинчалик бошқарувини назорат қилиши, кейинчалик эса глобал можароларни ҳал қилишда иштирок этиши кўзда тутилган. БМТ Хавфсизлик Кенгашининг 2025 йил ноябрь ойида қабул қилинган резолюциясида ҳам Ғазода халқаро барқарорликни таъминлаш учун зарур чоралар кўрилиши таъкидланган.
Бироқ, кўплаб ҳуқуқшунос ва мутахассислар Трампнинг ушбу ташаббусини танқид қилмоқда. Уларнинг фикрича, кенгашнинг тузилиши ва фаолияти БМТ ваколатларига путур етказиши мумкин. Шунингдек, кенгаш таркибида Фаластиндан вакиллар йўқ эканлиги ҳам эътирозларга сабаб бўлмоқда.
Маълумот учун, мазкур “Тинчлик кенгаши” низоми 2026 йил 22 январь куни Швейцариянинг Давос шаҳрида бўлиб ўтган Жаҳон иқтисодий форуми доирасида 19 мамлакат вакиллари, жумладан, Ўзбекистон Президенти Шавкат Мирзиёев томонидан имзоланган. ОАВга кўра, кенгашнинг биринчи йиғилиши жорий йилнинг 19 февраль куни ўтказилади.
