Жорий йилнинг сентябрь ойида Наманган шаҳрида профилактика инспектори томонидан фуқаро қийноққа солингани акс этган сурат ва хабарлар тарқалганди. Наманган вилояти прокуратураси томонидан фуқаро қийноққа солингани билан боғлиқ жиноят иши юзасидан олиб борилган тергов ҳаракатлари якунланди. Бу ҳақда Бош прокуратура маълум қилди.
Қайд этилишича, ҳолат Олий Мажлиснинг Инсон ҳуқуқлари бўйича вакили (омбудсман) томонидан назоратга олинган ва ўрганилган.
Омбудсманнинг Наманган вилоятидаги минтақавий вакили ҳолатни жойига чиқиб, фуқаро билан суҳбатлашиб, ўрганган. Ишга оид тўпланган маълумотлар асосида Наманган вилояти ИИБ ҳамда Наманган шаҳар прокуратурасига Омбудсманнинг назорат хати киритилган.
“Мазкур ҳолат билан боғлиқ жиноят иши юзасидан олиб борилган тергов ҳаракатлари якунланган. Ҳозирда жиноят иши мазмунан кўриб чиқишлик учун айблов хулоса билан судга юборилган”, дейилади хабарда.
Маълумот учун, ҳолат жорий йилнинг 14 август куни юз берган. Наманган шаҳрида яшовчи 1991 йилда туғилган фуқаро Ў.А. ўзаро оилавий низо сабабли ички ишлар бўлимига олиб борилган. У билан профилактик суҳбат олиб борилиб, шу куни уйига рухсат берилган. Орадан икки кун ўтиб, 16 август фуқаро Ў.А. соғлиги ёмонлашгани сабаб тиббиёт муассасасига мурожаат қилган.
Шундан сўнг, фуқаро Ў.А.га нисбатан етказилган тан жароҳатлари бўйича айбдорларнинг ҳаракатларига қонуний чора кўриш мақсадида Наманган шаҳар прокуратураси томонидан Жиноят кодексининг 104-моддаси 1-қисми (Қасддан баданга оғир тан жароҳати етказиш) билан жиноят иши қўзғатилганди.
