“Нью-Йорк Никс” клуби 2025/26 йилги мавсумда Миллий баскетбол ассоциацияси (NBA) ғолибига айланди. Бу жамоа тарихидаги учинчи чемпионлик унвонидир.
Финалда “Никс” жамоаси “Сан-Антонио Сперс” билан куч синашган. Тўртта ғалабагача давом этадиган серия бешта ўйинни ўз ичига олган.
14 июнга ўтар кечаси Нью-Йорк жамоаси рақибини 94:90 ҳисобида мағлуб этган. Шу тариқа, “Никс” бутун серияда 4:1 ҳисобида ғалаба қозонган.
Майк Браун шогирдлари 53 йил ичида илк бор NBA чемпиони бўлган. Бундан аввал “Нью-Йорк” унвонни 1970 ва 1973 йилларда қўлга киритган. “Сперс” эса беш карра лига ғолиби сифатида қолган.
Финалнинг энг яхши ўйинчиси (MVP) деб “Никс” аъзоси Жейлен Брансон топилган. Америкалик плеймейкер ҳал қилувчи серияда ҳар бир ўйинда ўртача 32,6 очко, 4,2 та топни илиб олиш ва 4,6 та голли узатмани амалга оширган. Якуний учрашувда у жамоасига 45 очко келтирган ва майдоннинг энг сермаҳсул ўйинчисига айланган.
