Оқ уйдаги тарихий “UFC Freedom 250” турнирининг асосий кард жангида Жастин Гэтжи Илия Топурияни техник нокаутга учратиб, енгил вазн тоифасининг янги чемпиони ва камар соҳибига айланди.
Бугун, Тошкент вақти билан 15 июнь тонгида АҚШ пойтахти Вашингтондаги Оқ уйда тарихий “UFC Freedom 250” турнири бўлиб ўтди. Илк бор профессионал спорт мусобақаси Оқ уй ҳудудида ташкил этилди. Турнир АҚШ мустақиллигининг 250 йиллиги ва Президент Дональд Трампнинг 80 ёшга тўлиши муносабати билан ўтказилди.
Кечанинг марказий жангида енгил вазн тоифасидаги чемпионлик учун Илия Топурия ва Жастин Гэтжи октагонга кўтарилди. Жангнинг дастлабки раундларида Топурия устунлик қилган бўлса-да, кейинчалик америкалик Гэтжи кучли ҳужумлар уюштириб, рақибини оғир аҳволга солди. Тўртинчи раунддан кейин шифокорлар текшируви ўтказилди ва Топуриянинг кўриш билан боғлиқ муаммолари борлиги сабабли мураббийлари жангни давом эттирмасликка қарор қилди. Шу тариқа Жастин Гэтжи UFC енгил вазн тоифасидаги чемпионлик камарини қўлга киритди.
“Бунга ўзим ҳам ишонолмаяпман. Биринчи раунддан ўтиб олишим кераклигини билардим, чунки у янги куч билан жуда хавфли, лекин менинг чидамлилигим, матонатим ва юрагим мени олға олиб чиқди”, деган Гэтжи жангдан кейин.
Кечага ташриф буюрган АҚШ Президенти Дональд Трамп Жастин Гэтжини шахсан табриклади.
Ко-мейн ивентда франциялик Сирил Ган бразилиялик Алекс Перейрани иккинчи раундда нокаутга учратиб, оғир вазн тоифасида вақтинчалик чемпионлик камарини қўлга киритди.
Турнир доирасида яна бир қатор шов-шувли жанглар бўлиб ўтди. Собиқ чемпион Шон О’Мэлли канадалик Айеманн Заҳабини нокаут эвазига мағлуб этди. Шунингдек, Бо Никал Кайл Даукаусни биринчи раундда нокаут қилиб, мухлислар олқишига сазовор бўлди.
Оммавий ахборот воситалари маълумотларига кўра, турнирни Оқ уй ҳудудида 4 мингга яқин меҳмон томоша қилган. Яна ўн минглаб мухлислар Вашингтон марказидаги махсус томоша майдонларида жангларни кузатган. Тадбирда АҚШ Мудофаа вазири Пит Ҳегсет, Meta компанияси раҳбари Марк Цукерберг, сиёсатчилар, бизнес ва шоу-бизнес вакиллари ҳам қатнашган.
