Германия полицияси таниқли сиёсатчиларни ўлдиришга чақирувчи даркнет платформасини юритганликда гумонланувчи эркакни қўлга олди. Бу ҳақда прокуратура маълумотига таяниб, Al Jazeera хабар берди.
Германия махфийлик қоидаларига мувофиқ, “Мартин С.” деб тан олинган Германия-Польша фуқаролигига эга шахс 10 ноябрь куни ушланган. У кечқурун Дортмунд шаҳрида ҳибсга олинган. Эркакнинг ўта ўнг Реич Cитизенс ҳаракати билан алоқалари борлигини маълум қилди.
У “терроризмни молиялаштириш, давлатга хавф солувчи оғир зўравонлик ҳаракатларини содир этиш ва шахсий маълумотларни хавфли тарқатиш бўйича кўрсатмалар бериш”да гумон қилинмоқда.
Прокурорларнинг таъкидлашича, Мартин С. камида июнь ойидан бери даркнетда сиёсатчилар, амалдорлар ва Германия жамоат ҳаётидаги бошқа шахсларга ҳужум қилишга чақирган. У платформада исмлар рўйхати, қотиллик ва портловчи моддаларни ишлаб чиқариш бўйича кўрсатмаларни эълон қилган.
Сиёсатчиларга ҳужум қилган шахсларга криптовалютада пул тўлаш режалаштирилган. Платформа потенциал жабрланувчиларнинг шахсий маълумотларини ўз ичига олган, деди прокурорлар.
Расмийлар Мартин С. нишонга олган сиёсатчилар ва жамоат арбобларидан бирортасининг исмини айтмаган бўлса-да, Spiegel журнали собиқ канслерлар Ангела Меркель ва Олаф Шольц, шунингдек, бошқа собиқ федерал вазирлар рўйхатда борлигини маълум қилди.
Германия сиёсатчилари сўнгги пайтларда оғзаки ва жисмоний ҳужумлар сони ошиб бораётганидан шикоят қилмоқда. Бу ҳолат жамиятдаги чуқурлашиб бораётган сиёсий бўлиниш фонида юз бермоқда.
Шунингдек, Германия ва бошқа Ғарб давлатларига нисбатан кибер таҳдидлар миқёси ҳам ортмоқда. Германияда экстремизм ва миллий хавфсизлик билан боғлиқ йирик жиноят ишларини федерал прокуратура юритади.
