Шавкат Мирзиёевнинг 12 ноябрдаги тегишли фармонига кўра, Америка—Ўзбекистон ишбилармонлик ва инвестиция кенгаши ташкил этилади.
Ҳужжатда қайд этилишича, Ўзбекистон ва АҚШ ўртасида ўзаро манфаатли савдо-инвестициявий ва тижорат алоқаларини янада кенгайтириш ва мустаҳкамлаш ҳамда ишбилармонлик муҳитини сифат жиҳатдан яхшилаш ва тадбиркорлик фаолиятини қўллаб-қувватлаш, ушбу йўналишда ишларни самарали ташкил этиш мақсад қилинган.
Кенгашга кўриб чиқиш учун киритиладиган қуйидаги масалаларни ишлаб чиқиш устувор ҳисобланади:
- стратегик бизнес ташаббуслар, йирик инвестиция ва савдо лойиҳалари ишлаб чиқилиши ва келишилишини мувофиқлаштириш, шунингдек, улар амалга оширилишини доимий мониторинг қилиш;
- Ўзбекистонга қўшимча инвестицияларни жалб этиш учун махсус инвестиция фондини яратиш, йирик инвесторлар сифатида Халқаро молиявий тараққиёт корпорацияси (DFC)ни ва Ўзбекистон томонидан ҳам инвесторларни белгилаш, шунингдек, муҳим инфратузилмавий ва стратегик лойиҳаларни молиялаштириш ва хатарларни тақсимлаш учун йирик молия институтларини (ЕТТБ, ХМК, ОТБ) жалб қилиш;
- тариф ставкаларини ўзаро пасайтириш масалалари бўйича музокараларни давом эттириш;
- дастурий маҳсулотлар ва ахборот технологиялари технологик парки (IT-парк) резидентлари бўлган компаниялар маҳсулотлари ва хизматларини тизимли равишда илгари суриш;
- мамлакатнинг инвестиция портфелини, шу жумладан, Ўзбекистон Марказий банки валюта захирасининг бир қисмини ва бошқа активларини диверсификациялаш бўйича таклифлар киритиш.
Қайд этилишича, президентнинг 2025 йил 4–6 ноябрь кунлари АҚШга ташрифи давомида “C5+1” саммити доирасида Америка—Ўзбекистон ишбилармонлик ва инвестиция кенгашини ташкил этиш бўйича келишувга эришилган. Кенгашга Ўзбекистон томонидан Президент администрацияси раҳбари Саида Мирзиёева, Америка томонидан эса АҚШ президенти вакили ҳамраислик қилади.
Ҳужжатда белгиланишича, Иқтисодиёт ва молия вазирлиги Марказий банк билан биргаликда даромадни ошириш мақсадида кенгашга энг фойдали ва юқори ликвидли, шу жумладан, АҚШда жойлашган активларга йўналтириш учун мамлакатнинг инвестиция активлари ва валюта захиралари тузилмасини такомиллаштириш юзасидан таклифлар киритади.
Инвестициялар, саноат ва савдо вазирлиги Ташқи ишлар вазирлиги билан биргаликда икки ҳафта муддатда Америка томони билан биргаликда доимий офиси АҚШда бўлган кенгашнинг ижро органи ходимлари доимий штатини, шу жумладан, АҚШ мутахассисларидан иборат таркибда шакллантириш масаласини ўрганиб чиқади.
Ўзбекистон томонидан кенгаш таркибини, шу жумладан, унга Америка ишбилармонлик ва инвестиция ҳамжамияти нуфузли вакилларини жалб қилган ҳолда тасдиқлашга киритади. Шунигдек, Америка томони билан Инвестицияларни ўзаро қўллаб-қувватлаш ва ҳимоя қилиш тўғрисидаги битим бўйича музокаралар бошланади.
Мазкур фармоннинг ижросини назорат қилиш Саида Мирзиёева зиммасига юклатилди.
