Шимолий Корея ўзининг 5 минг ҳарбийини Россияга юборди. Бу ҳақда разведка маълумотларига таяниб, Жанубий Корея Миллий ахборот агентлиги хабар берди.
Қайд этилишича, ҳарбийлар уруш кетаётган ҳудудда инфратузилмани тиклаш ишларида иштирок этади.
Маълумотларга кўра, Россияга тахминан 5 минг шимолий кореялик муҳандислик қўшинлари ҳарбийси етказилган, улар бузилган инфратузилмани тиклаш билан шуғулланади. Шунингдек, 1 минг ҳарбий майдонларда сапёрлик ишларига жалб қилинади. Умумий ҳисобда, Сеулнинг маълумотларига кўра, Пхеньян Россияга 10 мингга яқин ҳарбий жўнатади.
Жанубий Корея депутатларига кўра, ҳарбийлар сентябрдан бошлаб босқичма-босқич Россияга жўнатилмоқда. Шунингдек, Сеул Шимолий Корея томонидан яна қўшимча ҳарбийларни тайёрлаш ва танлаш ишлари давом этаётганини қайд қилмоқда.
Ҳозирда Россияда тахминан 10 минг шимолий кореялик ҳарбий ва 1000 сапёр фаолият юритмоқда. Депутатларнинг сўзларига кўра, КХДР ҳарбийларидан камида 600 нафари Украинадаги урушда ҳалок бўлган.
Жорий йилнинг июль ойида Россия Ташқи ишлар вазири Сергей Лавров Шимолий Корея етакчиси Ким Чен Ин билан учрашув чоғида Курск вилоятини озод қилиш бўйича кўрсатилган ёрдам учун миннатдорлик билдирган. Россия Ташқи ишлар вазирлигининг хабар беришича, Шимолий Корея Москванинг “махсус ҳарбий операцияси”ни доимий қўллаб-қувватлаб келади. Шунингдек, Шимолий Корея армияси ҳарбийлари Курск вилоятидаги ҳудудлардан Украина кучларини ва хорижий ёлланма ҳарбийларни ҳайдашда ёрдам бергани қайд этилган.
