Бугун, 1 сентябрь куни куни Лас-Вегасдаги судьялар ҳайъати суди “South Side Compton Crips” тўдаси етакчиси, 63 ёшли Дуэйн “Киффи Ди” Дэвисни рэпер Тупак Шакурнинг ўлдирилиши бўйича айбдор деб топди. Бу ҳақда “Reuters” хабар берди.
Қайд этилишича, Дэвис ўт очар қуролни қўллаган ҳолда қотиллик содир этганликда айбдор деб топилган. Бу қарор унга нисбатан 11 кун давом этган суд жараёнининг якуни бўлган. Ҳукм 13 октябрь куни эълон қилинади. Дэвисга шартли равишда муддатидан илгари озод қилиш ҳуқуқисиз умрбод озодликдан маҳрум қилиш жазоси тайинланиши кутилмоқда. Унинг ўзи эса судда ушбу қарор устидан шикоят қилишни режалаштираётганини айтган.
Маълумот учун, Тупак Шакур 1996 йил 7 сентябрь оқшомида Лас-Вегасда отиб кетилган. Ҳужумдан бироз олдин рэпер ва унинг “Death Row Records” лейбли раҳбари Мэрион “Шуг” Найт Дэвиснинг жияни ва “South Side Compton Crips” тўдаси аъзоси Орландо “Baby Lane” Андерсон билан мушташган. Бу тўда кенгроқ танилган “Crips” тўдалар тармоғига киради, Дуэйн Дэвис эса унинг Лос-Анжелес атрофидаги “бўлими” раҳбари бўлган.
Тахминларга кўра, Дэвис Тупакнинг ўлдирилишини қасос сифатида режалаштирган. Рэперга ичида “Киффи Ди” ҳам бўлган оқ рангли “Кадиллак”дан бир неча бор ўт очилган. Тупак бир нечта жароҳат олиб, шифохонада вафот этган.
“Reuters”нинг қайд этишича, полиция анчадан бери Дэвисни қотилликда шерик деб гумон қилган, аммо унга аниқ айблов қўя олмаган. 2019 йилда у ўз мемуарларини нашр эттирганидан сўнг иш жойидан жилган ва тергов қайта бошланган. Китобда Дэвис ҳужум пайтида “Кадиллак”да бўлганини ва орқа ўриндиқда ўтирганларга тўпончани узатганини айтиб берган.
Дуэйн “Киффи Ди” 2023 йилда ҳибсга олинган. Унинг ҳимояси Дэвиснинг мемуарлари “ҳужжатли эмас, балки бадиий асар” бўлгани учун айбловга асос бўла олмаслигини таъкидламоқда.
Ўт очган қотилнинг шахси ҳанузгача номаълум. Машинада бўлганларнинг ҳаммаси, Дэвисдан ташқари, ҳозирга келиб вафот этган, бироқ Невада штати қонунларига кўра, Дэвис тепкини ўзи босмаган бўлса ҳам, унга қотиллик айблови қўйилиши мумкин.
