АҚШ расмийлари 15 январь куни Венесуэла билан алоқадор бўлган навбатдаги нефть танкерини қўлга олганини маълум қилди. Бу Қўшма Штатлар президенти Дональд Трамп ва Венесуэла мухолифати етакчиси Мария Корина Мачадо ўртасидаги учрашув арафасида юз берди. Бу ҳақда Reuters хабар берди.
АҚШ Қуролли кучларининг Жанубий қўмондонлиги (SOUTHCOM) тонг саҳарда ўтказилган операцияни тасдиқлади. Маълум қилинишича, Вашингтон кучлари “Вероника” танкерини ҳеч қандай қаршиликсиз қўлга олган. Ҳарбийларнинг таъкидлашича, кема Кариб денгизида Трамп томонидан ўрнатилган санкция остидаги кемалар учун карантин тартибини бузган.
“Венесуэладан фақатгина тегишли тартибда ва қонуний мувофиқлаштирилган нефть чиқиб кетиши мумкин”, дейилади Жанубий қўмондонлик баёнотида.
Гайана байроғи остида сузувчи “Вероника” танкери январь ойи бошида Венесуэла сувларини бўш ҳолда тарк этган эди. Бу кема декабрь ойи ўрталаридан бери АҚШ қўлига тушган олтинчи кема бўлди.
Трампнинг 100 миллиард долларлик режаси
Ушбу чоралар Трампнинг Николас Мадурони ҳокимиятдан четлатиш кампаниясининг бир қисмидир. Венесуэла пойтахти Каракасда 3 январь куни АҚШ махсус кучлари Мадурони қўлга олган эди.
Ҳозирда Трамп Венесуэланинг нефть ресурсларини номаълум муддатгача назорат қилишни режалаштирмоқда. АҚШ маъмурияти мамлакатнинг абгор ҳолатдаги нефть саноатини тиклаш учун 100 миллиард долларлик улкан режани ишлаб чиққан.
“Соялар флоти”га қарши кураш
АҚШ ҳукумати Венесуэла нефть савдоси билан боғлиқ яна ўнлаб танкерларни қўлга олиш учун суд ордерларини расмийлаштирмоқда. Ҳозиргача тўхтатилган кемалар ёки санкция остида бўлган, ёки Эрон, Россия ва Венесуэла нефтини яширинча ташиш билан шуғулланувчи “соялар флоти” аъзолари ҳисобланади.
Ўтган ҳафтада АҚШ Россия сувости кемаси кузатиб бораётган ва Россия байроғи остида сузувчи танкерни Атлантика океанида икки ҳафталик таъқибдан сўнг қўлга олган эди. Москва бу ҳаракатни кескин қоралаган. Сўнгги бора қўлга олинган бешинчи танкер эса “Олина” деб аталади.
Мачадо билан учрашув ва сиёсий танлов
“Вероника” танкерининг қўлга олиниши Трамп ва Мачадо ўртасидаги илк юзма-юз учрашув арафасида юз берди. Трамп уни “озодлик курашчиси” деб атаса-да, уни Венесуэла раҳбари этиб тайинлаш ғоясини рад этган.
Марказий разведка бошқармасининг махфий ҳисоботига кўра, мамлакатда барқарорликни сақлаш учун Мадуро тарафдорлари, жумладан, ҳозирги муваққат президент Делси Родригес энг муносиб номзод деб топилган. Трамп Мачадонинг мамлакат ичида етарли қўлловга эга эмаслигини таъкидлаб келмоқда.
