АҚШ президенти Доналд Трамп Венесуэлада наркотрафикка қарши кураш доирасида қуруқликда ҳарбий амалиётлар бошланишини эълон қилди. Бу ҳақда у 1980 йилги АҚШ эркаклар хоккей терма жамоаси аъзоларига медаллар топшириш маросимидаги нутқида маълум қилди.
Трампнинг таъкидлашича, АҚШ денгиз орқали олиб кирилаётган наркотикларнинг 96 фоизини тўхтатишга эришган. Энди эса асосий эътибор қуруқлик орқали амалга оширилаётган каналларга қаратилмоқда. Унинг сўзларига кўра, зарбалар нафақат Венесуэлага, балки «наркотик олиб кириб, одамларни ўлдираётган барча ёмон гуруҳлар»га қарши йўналтирилади.
Сўнгги ойларда АҚШ Кариб денгизи ҳавзасида ҳарбий фаоллигини ошириб, наркотрафикка алоқадор деб ҳисобланган кемаларга зарбалар бериб келмоқда. Ноябрь ойи охирида Доналд Трамп Венесуэла устидан ҳаво ҳудуди ёпилганини эълон қилган, кейинчалик эса бу қарор тўғридан-тўғри ҳарбий зарбаларни англатмаслигини билдирган эди.
Венесуэла Ташқи ишлар вазирлиги мазкур баёнотларни БМТ низомига зид равишда куч ишлатиш билан таҳдид сифатида баҳолади. Шу ҳафта Трамп Венесуэла соҳиллари яқинида нефть ташувчи танкер ушлаб қолинганини ҳам маълум қилди. Reuters ва The New York Times маълумотларига кўра, АҚШ Венесуэла нефтини ташаётган бошқа танкерларни ҳам тўхтатишни режалаштирмоқда.
Ушбу ҳаракатлар Вашингтоннинг Венесуэла президенти Николас Мадурога нисбатан босимни кучайтириш стратегиясининг бир қисми сифатида баҳоланмоқда.
Аввалроқ Доналд Трамп Мадуро ҳокимияти яқин орада якун топишини айтган эди. Венесуэлада эса ҳарбий сафарбарлик эълон қилинган. Президент Николас Мадуро АҚШни тинчликка чақирмоқда. The Wall Street Journal нашрига кўра, октябрь ойи охирида Трамп Венесуэла раҳбари билан суҳбатда, агар у лавозимини ихтиёрий тарк этмаса, куч ишлатишга тайёр эканини билдирган. Мадуро эса 3–4 йилдан сўнг истеъфога чиқишини айтган, бироқ бу Вашингтонни қониқтирмаган.
