Исроил разведка хизмати – “Моссад”нинг собиқ раҳбари Йоси Коэн шов-шувли баёнот берди.
Й.Коэн “The Brink” подкастига берган интервьюсида Исроил жосуслик хизмати кузатув ва ҳамла учун дунёнинг кўплаб мамлакатларида қопқон сифатида манипуляцион қурилмалар ўрнатганини айтган.
Унга кўра, мазкур кузатув усули дунё бўйлаб фойдаланувчилардан маълумотлар йиғиш ва антисемитизм аломатлари намоён бўлган ҳолларда хатар манбасини йўқотиш мақсадида қўлланган.
Манипуляцион қурилмалар “сиз тасаввур этишингиз мумкин бўлган барча мамлакатларда”да ўрнатилган, деган Йоси Коэн.
“Моссад”нинг собиқ раҳбари, айни чоқда, яҳудий давлати жосуслик хизмати ҲАМАСнинг 2023 йил 7 октябрдаги ҳужумини бартараф эта олмагани, чунки қамалдаги Ғазога доир разведка ҳолати ёмон бўлганини ҳам тан олган.
“Телеграм”даги “Милитарист” канали Йоси Коэннинг дунё бўйлаб миналаштирилган пейжер ва рациялар тарқатилгани ҳақидаги очиқламасини ҳайратомуз деб баҳолаган. Мазкур канал ўтган йили Ливанда амалга оширилган пейжерларни портлатиш амалиётини ёдга олган.
Аввал хабар берганимиздек, 2024 йил 17 сентябрь куни Ливанда рўй берган пейжерлар ҳамда бошқа электроника буюмларининг портлаши оқибатида ўнлаб одам, жумладан, болалар ҳалок бўлган, бир неча минг киши жароҳатланган эди. Шифокорлар жабрланувчилар орасида кўриш қобилиятини йўқотганлар кўп эканини айтган.
Жаҳон оммавий ахборот воситалари ўшанда портлашлар “Моссад” томонидан амалга оширилган махфий амалиёт экани ҳақида ёзганди. Хусусан, Яқин Шарқдаги ҳодисаларни ёритишга ихтисослашган “Al Monitor” нашрига кўра, Исроил махсус хизмати “Ҳизбуллоҳ” ҳаракати Тайвань ширкатидан сотиб олган пейжерларни маҳсулот буюртмачига етиб боргунга қадар бўлган жараёнда миналаштиришга муваффақ бўлган.
“Sky News Arabia” манбалари фикрича, исроилликлар пейжерларга кириш имконига эга бўлиб, уларга портловчи PETN (пентаэритриттетранитрат) моддасини жойлаштирган. Батареялар қиздирилганда қурилма портлаган.
