Малдив ороллари ҳукумати мамлакатда 2007 йил январи ойидан кейин туғилганларга тамаки маҳсулотларини сотиш ва истеъмол қилишни тақиқлади. Бу ҳақда The Guardian хабар берди.
Мазкур тақиқ мамлакатни дунёда “авлодлар бўйича” чекишни ман қилган ягона давлатга айлантирди. Соғлиқни сақлаш вазирлигининг маълум қилишича, президент Моҳамед Муиззу илгари сурган бу қарор 1 ноябрдан кучга кирган.
Унга кўра, 2007 йил 1 январдан кейин туғилганлар Малдив ҳудудида ҳеч қандай тамаки маҳсулотини сотиб олиши, ишлатиши ёки уларга тамаки сотилиши мумкин эмас. Савдогарлар эса харидорларнинг ёшини аниқлаб, шундан сўнггина маҳсулот сотишлари лозим.
Қоидалар мамлакатга ташриф буюрадиган сайёҳларга ҳам тегишли. Бундан ташқари, электрон сигарет ва вейп воситаларини олиб кириш, сотиш, тарқатиш, сақлаш ва ишлатиш ҳам ёшдан қатъий назар бутунлай тақиқланган.
Вояга етмаганларга тамаки сотганларга 50 минг руфия (тахминан 3,200 доллар) жарима белгиланган. Вейп воситаларидан фойдаланганларга эса 5 минг руфия (320 доллар) жарима солинади.
Шунга ўхшаш қонун лойиҳаси ҳозирда Буюк Британияда кўриб чиқилмоқда. Янги Зеландия эса 2023 йил ноябрь ойида чекишни тақиқловчи шундай қонунни бекор қилган эди.
