Озарбайжон пойтахти Боку шаҳрида кенг кўламли реставрация ишлари якунланган “Бухоро карвонсаройи”нинг тантанали очилиш маросими бўлиб ўтди. Бу ҳақда “Дунё” агентлиги хабар берди.
ХV асрга тегишли бўлган ёдгорлик Озарбайжон президенти Илҳом Алиевнинг топшириғи ва Ичеришаҳар давлат тарихий-меъморий қўриқхонаси бошқармаси илтимосига биноан 3,5 йил ичида капитал таъмирланди. Ишлар Австриянинг Аtelier Erich Pummer GmbH компанияси томонидан амалга оширилган.
Тарихий объектнинг очилиш маросимида Озарбайжон президенти ёрдамчиси, Ҳайдар Алиев фонди ижрочи директори Анар Алекперов, маданият вазири ўринбосари Саодат Юсуфова, Ўзбекистон элчиси Баҳром Ашрафхонов, Ичеришаҳар қўриқхонаси бошқаруви раиси Руфат Маҳмуд, маданият ва жамоатчилик вакиллари иштирок этди.
Қайта тикланган карвонсарой ҳунармандлар учун замонавий ижод масканига айлантирилди. Мажмуада 18 та хона бўлиб, уларнинг ҳар биридан турли йўналишдаги усталар фойдаланади. Бу ерда тўқувчилик, ҳайкалтарошлик, кўнчилик, рассомлик, гиламдўзлик, миниатюра, бадиий кулолчилик ва ёғоч ўймакорлиги бўйича маҳорат дарслари ўтказилади.
Карвонсарой тарихда Мовароуннаҳр шаҳарларидан келган савдогарлар ва сайёҳлар учун савдо, маданий ва дўстона алоқаларни ривожлантириш маркази сифатида хизмат қилган.
