Германия Федерал жиноий полиция бошқармаси раҳбари Холгер Мюнх 2025-йилда мамлакат осмонида 1000 дан ортиқ шубҳали дрон парвозлари рўйхатга олинганини маълум қилди. Бу ҳақда Deutsche Welle хабар берди.
Бошқарма раҳбари дронларнинг тез-тез кўриниш беришини жиддий хавф-хатарли вазият деб атади. Германия канцлери Фридрих Мерс октябрь ойида мамлакат ҳудуди устидаги кўплаб дрон парвозлари ортида Россия турганига ишонишини билдирган эди.
Холгер Мюнх барча шубҳали дронлар Россия томонидан бошқарилаётганини “100 фоиз ишонч” билан айтиб бўлмаслигини, бироқ уларнинг ортида Германияда беқарорлик ва ноаниқлик уруғини сочишни кўзлаган қайсидир давлат субъекти турганини тахмин қилмоқда.
Аэропортлар ва ҳарбий базалар нишонда
Шубҳали дронлар 2025-йилда Германия аэропортлари фаолиятига жиддий зарар етказган. Жумладан, Мюнхен аэропорти 3 октябрь куни машҳур Октоберфест фестивали пайтида дронлар сабабли барча парвозларни тўхтатишга мажбур бўлган. Берлин Бранденбург аэропорти эса ноябрь ойида номаълум дронлар аниқлангани сабабли ўз фаолиятини қарийб икки соатга тўхтатган эди.
Шунингдек, учувчисиз аппаратлар тез-тез ҳарбий объектлар устида ҳам кўриниш бермоқда. Der Spiegel нашрининг ёзишича, 13 октябрь куни Росток шаҳри яқинидаги Гноен базасида тўртта дрон қайд этилган. Маълумотларга кўра, ўша пайтда ушбу базада украиналик аскарлар машғулот ўтаётган бўлган.
Германиянинг янги анти-дрон стратегияси
Германия расмийлари бундай таҳдидларга қарши самаралироқ курашиш чораларини кўрмоқда. Ички ишлар вазири Александр Добриндт 17 декабрь куни Берлинда Дронларга қарши кураш бўйича қўшма марказни очган. Тузилма сутка давомида тўхтовсиз ишлаб, федерал ва штат даражасидаги техник тажрибани бирлаштиради. Шунингдек, марказ орқали вазиятни биргаликда баҳолаш ва мувофиқлаштирилган ҳаракатлар таъминланади.
Бундан ташқари, Добриндт аэропортлар ва стратегик объектларга ёрдам берувчи махсус дрон мудофааси бўлинмасини ташкил этишга кўрсатма берди. Германия Қуролли кучлари (Бундесвер) эса дронлар тўдасига қарши курашишда самарали бўлган махсус зенит танкларига буюртма берди.
