Шавкат Мирзиёев раҳбарлигида ўтказилган йиғилишда Қашқадарё вилоятида туризм салоҳиятидан тўлиқ фойдаланиш ва янги йирик туризм лойиҳаларини амалга ошириш масалалари муҳокама қилинди.
Хусусан, Шаҳрисабз туманида бир вақтнинг ўзида 13 минг сайёҳга хизмат кўрсатишга мўлжалланган “Ғелон” халқаро умуммавсумий курортини барпо этиш режалаштирилгани маълум қилинди.
Йиғилишда йилига 1 миллион сайёҳни жалб қилаётган Мираки шаҳарчаси тажрибаси асосида туризм лойиҳаларини вилоятнинг бошқа ҳудудларида ҳам кенгайтириш зарурлиги таъкидланди. Шу доирада Қамаши туманида “Майданак” баланд тоғ туризм марказини ташкил этиш, Яккабоғ туманининг Татар қишлоғида туризм инфратузилмасини ривожлантириш ҳамда Ҳазрати Султон чўққиси ҳудудида трекинг йўналишлари ва чодирли уйлар оромгоҳини ташкил этиш лойиҳалари режалаштирилган.
Шунингдек, жорий йилда вилоятда 45 та меҳмонхона ва меҳмон уйи ташкил этилиб, қўшимча 1130 ўрин яратилиши белгиланди. Йиғилишда йўл, уй-жой ва муҳандислик-коммуникация инфратузилмасини яхшилаш масалалари ҳам кўриб чиқилди. Янги ёндашувлар асосида “Янги Ўзбекистон” қиёфасидаги 2 та туман ва 46 та маҳаллада, шунингдек оғир тоифадаги 3 та туман ва 108 та маҳаллада ички йўллар, сув таъминоти, суғориш инфратузилмаси ҳамда электр тармоқларини яхшилаш учун жами 864 миллиард сўм маблағ йўналтирилиши белгиланди.
Ижтимоий йўналишда оила ва хотин-қизларни қўллаб-қувватлаш ҳамда соғлиқни сақлаш тизимини ривожлантириш бўйича ҳам қатор чора-тадбирлар режалаштирилган. Жумладан, янги давлат ва хусусий боғча ҳамда мактаблар ташкил этиш, 120 минг нафар хотин-қизнинг бандлигини таъминлаш, 21,1 минг нафарини касб-ҳунар ва тадбиркорликка ўқитиш, “Аёллар дафтари” орқали 102 минг нафарига ёрдам кўрсатиш кўзда тутилган.
Бундан ташқари, Германия билан ҳамкорликда тартибли меҳнат миграцияси ва касбий тайёргарлик бўйича янги ташаббуслар тақдим этилди. Режаларга кўра, 2026 йилда 3000 нафар, 2027 йилда 5000 нафар ёшни Германияга ишга йўналтириш, уларни тайёрлаш учун Қарши шаҳрида Таълим ва технологиялар марказини ташкил этиш кўзда тутилган.
Йиғилиш якунида давлат раҳбари белгиланган вазифалар ижросини қатъий назоратга олиш, инвестиция ва экспорт кўрсаткичларини таъминлаш, янги иш ўринлари яратиш ҳамда аҳоли турмуш даражасини ошириш бўйича мутасаддиларга аниқ топшириқлар берди.
