Тошкент шаҳри Учтепа туманидаги хусусий дефектология маркази мутахассиси ёш болага нисбатан тазйиқ ўтказди.
Видеода аёл боланинг қулоғи ва қўлларига қистирғич қистириб, стулга боғлаб қўйганини кўриш мумкин. Кейинчалик бу видео унинг тармоқдаги саҳифасидан олиб ташланган, болакайнинг ўйнаб ўтиргани акс этган тасвирлар эълон қилинган.
Болалар омбудсмани ахборот хизматига кўра, видеода акс этган усул илмий асосланмаган бўлиб, бола соғлиғи учун хавф туғдиради. Вакил идораси бундай ёндашувни болага нисбатан руҳий ва жисмоний зўравонлик сифатида баҳолаб, у педагогика меъёрларига мутлақо зид эканини таъкидлади.
Ҳозирда мазкур ҳолат Болалар омбудсманининг сўрови асосида Ички ишлар вазирлиги томонидан ўрганилмоқда. Ҳолат юзасидан терговга қадар текширув ҳаракатлари олиб борилаётгани билдирилди.
Болалар омбудсмани бола манфаатлари нуқтаи назаридан ушбу иш бўйича мониторингни давом эттиришини маълум қилди. Қўшимча маълумотлар кейинчалик тақдим этилиши кутилмоқда.
