Хоразмда айрим соҳаларда коррупция омилларини бартараф этишга қаратилган чора-тадбирлар ижроси етарлича таъминланмаётгани танқид қилинди. Бу ҳақда Коррупцияга қарши курашиш агентлиги хабар қилди.
Қайд этилишича, вилоятда 2025 йилда 2024 йилга нисбатан коррупциявий жиноятлар сони 34 фоизга камайган. Бироқ коррупциявий хавф-хатарлар юқори бўлган айрим соҳаларда тегишли чоралар етарлича кўрилмаган.
“2025 йилда вилоятда манфаатлар тўқнашуви ва давлат хизматида тадбиркорлик билан шуғулланишга йўл қўйганлиги учун 12 нафар шахс маъмурий жавобгарликка тортилган”, деди агентлик директори Акмал Бурханов.
Шунга қарамай, вилоят, туман ва шаҳар ҳокимликларида ўтказилган ўрганишларда 60 га яқин бошқарув ходимларининг тадбиркорлик субъектларида таъсисчи ёки раҳбар сифатида фаолият юритаётгани аниқланган.
Коррупцияга қарши курашишга оид вазифаларни амалга оширишда тизимли камчиликларга йўл қўйган 10 нафардан ортиқ масъул раҳбарга нисбатан қатъий чора кўриш бўйича таклифлар Миллий кенгашга киритилган.
“Давлат фуқаролик хизмати тўғрисида”ги қонуннинг 13-моддасига асосан, давлат фуқаролик хизматчиси тадбиркорлик фаолияти субъектларини ташкил этишга, уларнинг муассиси (иштирокчиси) бўлишга, тадбиркорлик фаолияти субъектида ташкилий-бошқарув, маъмурий-хўжалик вазифаларини бажаришга ҳақли эмас.
