Хоразмда Ал-Хоразмий ҳайкали ва хиёбонни ободонлаштириш учун 25 миллиард сўм ажратилади. Бу ҳақда вилоят ҳокимининг 2026 йил 18 февралдаги фармойишида келтирилган.
Ҳужжатда қайд этилишича, ҳайкални ясаш ва ўрнатиш ҳамда хиёбонни ободонлаштириш ишлари учун 25 миллиард сўм вилоят маҳаллий бюджетининг 2026 йил 1 январь ҳолатига эркин қолдиғи ҳисобидан Ўзбекистон бадиий академиясига ажратилади.
Фармойиш президентнинг 2025 йил май ойида Хоразм вилоятига ташрифи давомида берилган топшириқлар ҳамда халқ депутатлари вилоят Кенгашининг тегишли қарорига мувофиқ қабул қилинган.
Вилоят ғазначилик хизмати бошқармаси ажратилган маблағларнинг ўтказилишини таъминлаши ҳамда вилоят ҳокимининг молия иқтисодиёт ва камбағалликни қисқартириш масалалари бўйича биринчи ўринбосари фармойиш ижросини назорат қилиши белгиланган.
Ўтган йилнинг 1 май санасида 130 гектар майдонда барпо этилаётган Ал-Хоразмий шаҳарчасида 20 гектарлик боғнинг кириш қисмига 22 метр, пойдевори билан эса 30 метрга борадиган Хоразмий ҳайкали ўрнатилиши маълум қилинган.
