Украина Беларусь президенти Александр Лукашенкога нисбатан санкциялар пакетини жорий қилди. Бу ҳақда мамлакат президенти Владимир Зеленский ўзининг Telegram каналида хабар берди.
“Бугун Украина Александр Лукашенкога қарши санкциялар пакетини қўллади ва биз украиналикларни ўлдиришга ёрдам беришнинг барча шаклларига қарши курашни сезиларли даражада фаоллаштирамиз”, деди Зеленский.
У бу чоралар глобал таъсир кўрсатиши учун Украина ҳамкор давлатлар билан ишлашини таъкидлади. Зеленский 2025 йилнинг иккинчи ярмида россияликлар Беларусь ҳудудида зарба берувчи дронларни бошқариш учун ретрансляторлар тизимини ишга туширганини айтди. Бу Россия армиясининг Украинанинг шимолий ҳудудларига, хусусан, Киевдан Волин вилоятигача зарба бериш имкониятини оширган.
Беларусь ёрдам бермаганида, душман энергетика объектлари ва темир йўл инфратузилмасига айрим зарбаларни амалга оширолмаган бўларди, деди Украина раҳбари.
Бундан ташқари, Беларуснинг 3 мингдан ортиқ корхонаси Россияга муҳим техника, асбоб-ускуналар ва бутловчи қисмларни етказиб турибди. Улар Украинага учириладиган ракеталарни ишлаб чиқариш учун фойдаланиладиган компонентлар ҳисобланади.
“Беларусь ҳудудида ўрта масофали ракеталарни жойлаштириш учун инфратузилмани ривожлантириш давом этмоқда Бу нафақат украиналиклар, балки барча европаликлар учун очиқ таҳдиддир. Александр Лукашенко Беларусь ҳудудини “Орешник” баллистик ракета учун тақдим этиш билангина чекланиб қолмади. 2025 йили мамлакат корхоналари Россияга ушбу қуролнинг муҳим қисмлари, компонентлари ва механик базасини етказиб берган”, деди Зеленский.
У 2026 йилда ҳам етказиб бериш давом этаётганини маълум қилди.
“Александр Лукашенко анчадан бери шахсий ҳокимиятини давом эттириш учун Беларусь суверенитетини айирбошламоқда, россияликларга санкцияларни четлаб ўтишга ёрдам бермоқда. Россия урушини фаол оқламоқда, энди эса ўзининг иштирокини ҳам кенгайтирмоқда”, дея хулоса қилди Украина президенти.
Санкциялар активларни блокировка қилиш, улардан фойдаланишни тақиқлаш, савдо операцияларини тўлиқ тўхтатиш, Украинадан ер, мулк сотиб олиш ва мамлакатга киришни тақиқлашни назарда тутади.
