Бугун, 25 февралга ўтар кечаси Туркияда ҳарбий F-16 қирувчи самолёти автомобиль йўлига қулаб тушди ва оқибатда учувчи ҳалок бўлди. Бу ҳақда мамлакат Мудофаа вазирлиги маълум қилди.
Хабар қилинишича, Баликесир шаҳридаги 9-асосий реактив авиабаза қўмондонлигидан кўтарилган самолёт тунги соат 00:56 атрофида, Измир–Истанбул шоссеси ҳудудига қулаган. Самолёт қулагач, воқеа жойида кучли ёнғин келиб чиққан, парчалар эса юзлаб метрга сочилиб кетган.
Мудофаа вазирлиги кейинчалик аниқлик киритиб, самолёт билан алоқа соат 00:56 да узилганини ва радар кузатувидан йўқолгани ҳақида хабар берган. Учувчи билан ҳам алоқа узилган.
Қидирув-қутқарув ишлари давомида самолёт қолдиқлари топилган. Учувчининг ҳалок бўлгани тасдиқланган.
Ҳозирда мазкур ҳодиса сабаблари махсус авиация ҳалокатларини текширувчи комиссия томонидан ўрганилмоқда.
