Андижонда божхоначилар 2 миллиард сўмлик заргарлик буюмларининг ноқонуний айланмасига чек қўйди. Бу ҳақда Давлат божхона қўмитаси хабар берди.
Қайд этилишича, Андижон вилояти божхона бошқармаси тезкор тузилмалари томонидан ҳуқуқни муҳофаза қилувчи бошқа органлар билан ҳамкорликда Андижон шаҳрида ўтказилган тезкор тадбирда олдиндан кузатувга олинган шахс бошқа бир шахсдан заргарлик буюмлари жойланган жўнатмани қабул қилиб олаётган вақтида тўхтатиб қолинган.
Жўнатма белгиланган тартибда ва холислар иштирокидаги очиб кўрилганида, унинг ичида махсус тайёрланган 3 та ўрам борлиги аниқланган. Ўрамдан эса умумий оғирлиги 1 кг 138 гр оғирликдаги ва тилландан ишланган 175 дона тайёр заргарлик буюмлари топилган. Сифати ва божхона расмийлаштирувини тасдиқловчи ҳужжатлари бўлмаган мазкур тилла тақинчоқларнинг дастлабки қиймати тахминан 2 миллард сўмни ташкил этган.
Билдирилишича, Андижон вилояти божхона бошқармаси ходимлари жорий йилнинг ўтган даврида заргарлик буюмларининг ноқонуний айланмаси билан боғлиқ 55 та ҳуқуқбузарлик ҳолатларига чек қўйган. Натижада қиймати 6 млрд сўмдан ортиқ 7,5 кг оғирликдаги заргарлик буюмлари вақтинча сақловга олинган.
