Андижон шаҳридаги хонадонда нарколаборатория ташкил этилгани аниқланди. Бу ҳақда Давлат хавфсизлик хизмати хабар берди.
Маълум қилинишича, гиёҳвандлик воситаларининг ноқонуний айланмасига қарши курашиш доирасида ДХХ ходимлари томонидан Ички ишлар органлари билан ҳамкорликда ўтказилган тезкор тадбир давомида ўзининг яшаш хонадонида нарколаборатория ташкил қилган Андижон шаҳрида истиқомат қилувчи, 1987 йилда туғилган фуқаро қўлга олинди.
Наркотик моддалар тайёрлаш ва сотиш билан шуғулланган мазкур шахснинг уйидан “гашиш” моддаси, кристалл кўринишидаги синтетик гиёҳвандлик воситаси, “Тропикамид” кучли таъсир қилувчи дори воситалари, наркотик модда тайёрлашда керак бўладиган хом ашёлар, махсус идишлар, қадоқлашда фойдаланиладиган зип пакетлар, 4 та телефон ва 1 та ноутбук ашёвий далил сифатида олинган.
Шунингдек, мазкур ноутбукда мижозларга синтетик гиёҳванд моддаларни сотиш ва локация ташлаб бериш учун гумонланувчи томонидан бошқарилган 3 та Telegram бот ҳамда уй шароитида нарколаборатория ташкил қилиш билан боғлиқ видео ва расм кўринишидаги қўлланмалар (слайдлар) мавжудлиги аниқланган.
Ҳолат юзасидан мазкур шахсга нисбатан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) 2-қисми билан жиноят иши қўзғатилиб, қамоқ эҳтиёт чораси қўлланилган ҳамда ашёвий далиллар экспертизага юборилган.
Тергов ҳаракатлари доирасида унинг жиноий алоқаларини аниқлаш бўйича тегишли чора-тадбирлар амалга оширилмоқда.
