Андижон шаҳрида ижтимоий тармоқларда кўпроқ кузатувчи йиғиш мақсадида мушук боласини қурилиш майдончасига улоқтирган ва ҳолатни видеога олиб тарқатган ёшлар ушланди. Бу ҳақда Андижон вилояти ИИБ ахборот хизмати хабар қилди.
Маълум қилинишича, жорий йилнинг 27 июль куни Шаҳрихон туманида яшовчи, 2008 йилда туғилган фуқаро Андижон шаҳридаги Navro‘z Mall савдо мажмуаси олдида мушук боласини кўриб қолган. У ижтимоий тармоқларда машҳурликка эришиш мақсадида жониворни баланд тўсиқ орқали қурилиш майдончасига улоқтирган.
Бу жараён унинг 2006 йилда туғилган таниши томонидан видеотасвирга олиниб, 18 ёшли йигитнинг Instagram’даги шахсий саҳифасига жойлаштирилган. Кенг муҳокамаларга сабаб бўлган мазкур видео юзасидан ИИБ ходимлари томонидан суриштирув ишлари олиб борилди.
Ҳолат юзасидан ҳуқуқбузарларнинг ҳар бирига нисбатан Маъмурий жавобгарлик тўғрисидаги кодекснинг 111-моддаси (ҳайвонларга нисбатан шафқатсиз муносабатда бўлиш) билан маъмурий баённомалар расмийлаштирилиб, базавий ҳисоблаш миқдорининг 10 баравари миқдорида жарима жазоси тайинланди.
“Мушукни қўлимга олиб, улоқтиргандан кейин камерага қараб ‘мушукнинг жони 40 та эмас, 39 та қолди’ деб кулгандим. Аслида адашибман, 10 баравар жарима экан. Ҳайвонларга нисбатан қайтиб бундай муносабатда бўлмайман. Мени кечиринглар”, дейди ҳуқуқбузар йигит.
Жониворни тасвирга олган шериги ҳам қилмишидан қаттиқ пушаймонлигини, ўша вақтда дўстини тўхтатиб қолиши кераклигини айтиб, жамоатчиликдан узр сўраган.
