Қирғизистондан Фарғона вилоятига бериб юборилган “почта” ичида наркотик дорилар борлиги аниқланди. Бу ҳақда Божхона қўмитаси хабар берди.
Маълум бўлишича, “Фарғона” чегара божхона пости орқали қўшни давлатдан кириб келган фуқаро бошқарувидаги енгил автотранспорт воситаси белгиланган тартибда кўздан кечирилган.
Жараён давомида ҳайдовчига Сўх туманидан Фарғона шаҳрига бериб юборилган 2 дона юклар ичида кийимга ўралган ҳамда озиқ-овқат маҳсулотлари ичига яширилган 150 қути ноқонуний дори воситалари борлиги аниқланган.
Текширув вақтида мазкур дори воситалари 6000 дона “Таwон liar” номли дори воситаси эканлиги маълум бўлган.
Хабарга кўра, ушбу дориларнинг таркибидан “Тапентадол” гиёҳвандлик моддаси топилган.
Ҳолат бўйича божхона органлари томонидан жиноят иши қўзғатилди.
