Ҳиндистон ҳукумати фуқароларнинг смартфонларига давлат томонидан ишлаб чиқилган Sanchar Saathi иловасини ўрнатади.
Apple, Samsung, Xiaomi ва бошқа ишлаб чиқарувчилар кейинги 90 кун ичида нафақат янги, балки аллақачон ишлатилаётган смартфонларда ҳам иловани ўчириб бўлмайдиган тарзда ўрнатиш имкониятини таъминлаши керак.
Тегишли баёнот 1 декабрь куни Ҳиндистон ҳукуматининг Матбуот ахборот бюроси (ПИБ) томонидан эълон қилинди. Ҳукумат вакилларига кўра, бундай чора кибержиноятлар ва фирибгарларга қарши курашиш ва фуқароларни давлат фаолияти ҳақида хабардор қилиш учун зарур.
Sanchar Saathi иловаси ўғирланган смартфонлардаги маълумотларни топиш, блоклаш ва бошқаришга ёрдам беради. Илова туфайли Ҳиндистон фуқаролари аллақачон 700 мингта ўғирланган ёки йўқолган мобил телефон маълумотларини тиклашга эришгани айтилмоқда.
Ҳиндистон мухолифати ва инсон ҳуқуқлари ҳимоячилари бу талабни танқид қилиб, уни конституцияга зид деб баҳолади. Улар мамлакат ҳукумати Sanchar Saathi’дан фуқароларни кузатиш учун фойдаланмоқчи эканидан хавотирда.
