Бугун, 12 июнь куни Жанубий Корея суди собиқ президент Юн Сок Ёлни Шимолий Корея ҳудудига дронлар юборганликда айбдор деб топиб, 30 йилга озодликдан маҳрум қилди. Бу ҳақда BBC хабар берди.
Прокурорлар Юн 2024 йилнинг октябр ойида Шимолий Кореяни атайлаб провокация қилиш ва кейинчалик жорий этилган муваффақиятсиз ҳарбий ҳолатга баҳона яратиш учун ушбу операцияни буюрганини айтган.
Юн 2024 йилнинг 3 декабрда ҳарбий ҳолат эълон қилганида, бу қарорини мамлакатни Шимолий Кореяга хайрихоҳ давлатга қарши кучлардан ҳимоя қилиш зарурати билан изоҳлаган эди. Бироқ кейинчалик унинг қарори асосан ички сиёсий муаммолар билан боғлиқ экани маълум бўлди ва оммавий норозилик намойишлари ортидан ҳарбий ҳолат бекор қилинди.
Шундан сўнг Юн импичмент орқали лавозимидан четлатилган ва ҳарбий ҳолатни ноқонуний жорий этишга урингани учун давлатга қарши исён айби билан умрбод қамоқ жазосига ҳукм қилинган.
Сеул округ суди Юн, собиқ мудофаа вазири Ким Ён Хён, Мудофаа контрразведка қўмондонлигининг собиқ раҳбари Йо Ин Хён ва Дрон операциялари қўмондонлигининг собиқ раҳбари Ким Ён Дени давлатга хиёнат ва мансаб ваколатини суиистеъмол қилишда айбдор деб топган.
Суд қарорига кўра, Ким Ён Хён ҳам 30 йилга қамалган. Йо Ин Хён 15 йил, Ким Ён Де эса 3 йил қамоқ жазосига ҳукм қилинган, бироқ унинг жазоси 5 йил муддатга шартли равишда кечиктирилган.
Суд баёнотида айтилишича, айбланувчилар ҳарбий операция ниқоби остида Шимолий Кореяни жавоб чораларига ундаш ва фавқулодда вазият яратишга уринган. Суд шунингдек, уларнинг ҳаракатлари ҳарбий можаро хавфини оширганини қайд этиб, ушбу воқеалар учун асосий жавобгарлик Юн зиммасига эканини таъкидлаган.
Юннинг адвокатлари эса унинг ҳаракатлари Шимолий Кореянинг 2024 йилда Жанубий Корея ҳудудига чиқинди ва ахлат ортилган шарларни учиргани ортидан қилинган қонуний жавоб чораси бўлганини билдирган.
2024 йилда икки Корея ўртасидаги кескинлик Шимолий Корея Пхеньян устига тарғибот варақалари ташлаган дронларни Жанубий Корея юборганини даъво қилганидан кейин янада кучайган эди. Судья ҳукмда айнан Юн Шимолий Кореянинг жавоб зарбасини қўзғатиш умидида ушбу дронларни юборганини маълум қилган.
Бундан ташқари, Юн мансаб ваколатини суиистеъмол қилиш ва ўзини ҳибсга олишга тўсқинлик қилганлик учун ҳам 5 йил қамоқ жазосига ҳукм қилинган.
Маълумот учун, Юн Сок Ёль Жанубий Кореяда қамоқда сақланган ҳолда айблов эълон қилинган илк амалдаги президент бўлди. У собиқ мудофаа вазири ва бошқа шахслар билан тил бириктириб, конституциявий тузумни издан чиқариш мақсадида исён уюштиришда айбланмоқда.
