Бельгияда истиқомат қилувчи Лоран Симонс 15 ёшида иккинчи докторлик даражасини қўлга киритди. У биринчи диссертациясини 12 ёшида ҳимоя қилган. Бу ҳақда Bild хабар берди.
Маълум қилинишича, Лоран саккиз ёшида мактаб аттестатини олган, 11 ёшида эса магистратурани тамомлаган. У ҳозирда Мюнхендаги Гелмголтс марказида (Германия) учинчи илмий даражаси устида ишламоқда. Симонс тиббиёт ва сунъий интеллект уйғунлигини ўрганмоқда.
Ўсмирнинг охирги диссертацияси назарий квант физикасига бағишланган. Илгари у экспериментал физика бўйича диссертация ҳимоя қилган эди. Лораннинг айтишича, унга фотографик хотира ва мураккаб ҳодисалар ўртасидаги боғлиқликларни тезда аниқлаш қобилияти ёрдам беради.
Лораннинг ота-онаси унинг ғайриоддий қобилиятлари эрта ёшда намоён бўлганини таъкидлади. У тўрт ёшида мактабда ўқишни бошлаган, олти ёшида гимназияга ўқишга кирган. Саккиз ёшида имтиҳонларни топширган, тўққиз ёшида университетга ўқишга кирган ва 12 ёшида Макс Планк институти тарихидаги энг ёш докторантлардан бири бўлди.
У Рим папаси билан учрашган, Нобель мукофоти совриндорлари билан мулоқотда бўлган ва дунёнинг етакчи илмий марказларида нутқ сўзлаган.
“Мен картингда учишни ва дўстларим билан кинотеатрда Marvel фильмларини томоша қилишни ёқтираман. Баъзан уйда дам олиб, Fortnite каби видеоўйинларни ўйнаймиз. Дўстларим билан ўзимни оддий одамдек тута оламан. Чалғимоқчи бўлганимда мусиқа тинглайман, баъзида эса рақсга тушишни яхши кўраман”, деди Лоран.
