Қозоғистонда учинчи мамлакатлардан ҳамда Евроосиё иқтисодий иттифоқи давлатларидан тухум олиб киришга вақтинча тақиқ жорий қилинди. Бу ҳақда мамлакат Қишлоқ хўжалиги вазирлиги хабар берди.
Вазирлик сайтида қайд этилишича, Қишлоқ хўжалиги вазирининг буйруғига кўра, барча турдаги транспорт воситалари орқали учинчи мамлакатлардан ва ЕОИИ давлатларидан Қозоғистон Республикаси ҳудудига янги товуқ тухумларини олиб киришга вақтинчалик тақиқ жорий этилади. Чекловлар бир ой муддатга белгиланади.
“Тақиқ Қозоғистон Республикаси ҳудуди орқали янги товуқ тухумларининг транзитига, шунингдек Евроосиё иқтисодий иттифоқига аъзо бир давлат ҳудудидан иттифоққа аъзо бошқа давлат ҳудудига Қозоғистон ҳудуди орқали олиб ўтилишига татбиқ этилмайди”, дейилади хабарда.
Қайд этилишича, озиқ-овқат тухумларининг импортига вақтинчалик тақиқ маҳаллий ишлаб чиқарувчиларни қўллаб-қувватлаш мақсадида жорий этилган.
Буйруқ кеча, 11 декабрдан кучга кирган.
