FIFA томонидан эълон қилинган глобал трансферлар ҳисоботига кўра, 2025 йилда халқаро трансферлар сони рекорд даражага етди. Ҳисоботда қайд этилишича, йил давомида жами 86 158 та халқаро трансфер амалга оширилган.
Эркаклар футболида клубларнинг трансферларга йўналтирган маблағи 13,08 миллиард долларни ташкил этди. Бу кўрсаткич футбол тарихидаги энг юқори сумма сифатида қайд этилди. Аёллар футболида ҳам ўсиш кузатилди: жами 2440 та трансфер амалга оширилди, бу 2024 йилга нисбатан 6,3 фоизга кўп. Трансферлар учун сарфланган маблағ эса 28,6 миллион долларни ташкил этиб, ўтган йилга қараганда 80 фоиздан ортиқ ошди.
Эркаклар футболида 2025 йил давомида Англия клублари энг кўп маблағ сарфлаган ҳамда трансферлардан энг катта даромад олган мамлакат сифатида қайд этилди. FIFA ҳисоботига кўра, инглиз клублари футболчиларни харид қилиш учун жами 3,82 миллиард доллар сарфлаган, футболчи сотиш орқали эса 1,77 миллиард доллар даромад кўрган.
Трансферлар сони бўйича эса Бразилия клублари етакчилик қилди. 2025 йилда Бразилия жамоалари 1 190 нафар футболчини сотиб олган, 1 005 нафар футболчини эса бошқа клубларга трансфер қилган.
Маълумот учун, 2025 йилнинг энг қиммат трансферини “Ливерпуль” амалга оширди. Клуб Александер Исакни 172 миллион доллар (125 миллион фунт стерлинг) эвазига сотиб олди. Иккинчи поғонадан ҳам мерсисайдликлар ўрин олди. Умуман олганда, ўтган мавсум трансферлар учун энг кўп маблағ сарфлаган клуб ҳам “Ливерпуль” бўлди. Мерсисайдликлар 2025 йилнинг ёзида янги футболчиларни сотиб олиш учун 570 миллион доллар (480 миллион фунт стерлинг) харажат қилган.
