Испания ҳукумати Туркияда ишлаб чиқарилган Ҳуржет ўқув-машғулот самолётларини харид қилишни маъқуллади. Бу ҳақда испан ҳукуматига таяниб, Daily Sabah хабар берди.
3,12 миллиард евролик (тахминан 3,6 миллиард доллар) шартнома доирасида Испания 45 дона Ҳуржет қирувчи самолётини харид қилади. Улар ҳозирда фойдаланилаётган эски F-5 (АЭ.09) самолётлари ўрнини босади. Расмий маълумотларга кўра, мазкур шартнома Испания ҳаво ва космик кучлари учун жанговар учувчиларни тайёрлаш тизимини янгилаш ва кенгайтиришга қаратилган. Икки давлат ўртасида мазкур савдо юзасидан меморандум ҳам имзоланган. Унга кўра:
🔹 етказиб бериш 2028-йилда бошланади. Дастлабки Ҳуржет самолётлари 2029–2030-ўқув мавсумида фойдаланишга топширилади;
🔹 самолётлар камида 30 йил хизмат қилиши режалаштирилган;
🔹 битим муддати 2035 йил 30 ноябргача амал қилади.
Лойиҳада Airbus компанияси бош координатори сифатида қатнашади, шунингдек 15 та йирик испан авиакомпанияси (жумладан Aernnova, Aertec va Aciturri) ҳам ҳамкорлик қилади. Испания Саноат вазирлиги ушбу лойиҳа учун 1,04 миллиард евро миқдорида молиявий ёрдам ажратиши режалаштирилган.
Мутахассислар бу ҳамкорлик Туркия авиация саноатининг илғор технологияларидан фойдаланган ҳолда Испаниянинг янги авлод ўқув тизимини яратишга замин яратади, дея таъкидлашмоқда.
