Бугун, 6 декабрь куни Афғонистон ва Покистон чегарасидаги ҳарбийлар ўртасида отишма юз берди. Бу ҳақда “Al Jazeera” хабар берди.
ОАВ маълумотларига кўра, ҳозирча ҳалок бўлганлар ёки вайроналар ҳақида маълумот йўқ.
“Кечқурун Покистон ва Афғонистон қўшинлари ўртасида отишма содир бўлди. Ҳар икки томон бир-бирини айблади. Бу воқеа сўнгги икки ой давомида амал қилиб келинаётган мўрт сулҳни бузди”, дейилади хабарда.
Кескинлик Покистон Афғонистонга гуманитар ёрдам етказишга рухсат беришини эълон қилганидан бир кун ўтиб юзага келган. Мазкур ёрдам аввал кескинлик сабаб ёпиқ бўлган чегара ўтиш пунктлари орқали юборилиши режалаштирилган эди.
“Толибон” муваққат ҳукумати вакилларининг фикрича, можаро бошланишига айнан Покистон Қуролли кучлари сабаб бўлган.
Икки давлат ўртасидаги муносабатлар Покистон ҳарбий-ҳаво кучлари 9 октябрь куни Қобулга зарба бериб, “Толибон”нинг уч раҳбарини йўқ қилишга уриниши ортидан кескинлашган. Шундан кейин чегарада бир қатор тўқнашувлар юзага келган. Томонлар 15 октябрь куни вақтинчалик ўт очишни тўхтатиш ҳақида келишиб олган эди.
