Бугун, 24 майга ўтар кечаси Вашингтондаги Оқ уй яқинида ўқ овозлари янгради. Бу ҳақда “NewsNation” телеканали мухбири Либби Дин Х ижтимоий тармоғида маълум қилди.
У ўқ овозлари жуда кўп бўлганини қайд этган.
“Махфий хизмат журналистларни Шимолий майсазордан олиб чиқиб кетди”, дейди Дин.
CNN телеканалининг хабар беришича, гап ўнлаб ўқ узишлар ҳақида бормоқда. Ҳодиса 17-кўча ва Пенсильвания авенюси чорраҳасида содир бўлган. Журналистлар зудлик билан майсазордан Оқ уй ичкарисига киритилган ва уларга жойларидан жилмаслик буюрилган. Шундан сўнг, Махфий хизматнинг винтовкалар билан қуролланган агентлари бино олдида навбатчиликни бошлашган.
Воқеа содир бўлаётган вақтда АҚШ Президенти Дональд Трамп қароргоҳ ичида бўлган. Оқ уй хавфсизлик хизмати отишмадан сўнг бинода изоляция режимини жорий этган. NBC телеканали журналисти Жули Циркиннинг сўзларига кўра, Қўшма Штатлар Махфий хизмати ходимлари қуролларини шай тутган ҳолда ОАВ вакилларига брифинг хонасига яширинишни буюрган.
Отишма оқибатида Дональд Трамп жабр кўрмаган.
“Тасдиқланди: бугун кечқурун Оқ уй яқинида ўқ овозлари янгради. Президент хавфсиз жойда, дейди PBS мухбири Лиз Лендерз.
Лендерзнинг қўшимча қилишича, икки киши ўқдан жароҳат олган: улардан бири гумонланувчи, иккинчиси эса тасодифий йўловчи.
