Франция Исроилнинг Миллий хавфсизлик вазири Итамар Бен-Гвирга мамлакат ҳудудига киришни тақиқлади. Бу ҳақда Франция Ташқи ишлар вазири Жан-Ноэль Барро ўзининг Х саҳифасида кеча, 23 май куни маълум қилди.
Париж расмийларининг бу қарори Бен-Гвирнинг “Сумуд” номли гуманитар флотилия иштирокчиларига нисбатан тутган муносабати билан боғлиқ. Бу флотилия Ғазо секторига ёрдам етказиш мақсадида йўлга чиққан бўлиб, Исроил денгиз кучлари томонидан тўхтатилган.
Вазирнинг сўзларига кўра, бу флотилия “ҳеч қандай фойдали натижа бермайдиган ва дипломатик ҳамда консуллик хизматларини ортиқча юклайдиган ташаббус” бўлган.
Шунга қарамай, Барро Франция фуқаролари ва бошқа Европа давлатлари фуқароларига нисбатан давлат амалдори томонидан таҳдид ва қўрқитиш бўлганини қабул қилиб бўлмаслигини таъкидлаган.
У, шунингдек, Италия Ташқи ишлар вазири Антонио Таяни каби,Европа Иттифоқини Итамар Бен-Гвирга қарши санкциялар жорий этишга чақирган.
Олдинроқ, Итамар Бен-Гвир интернетда “Сумуд” флотилияси фаолларининг ҳибсга олиниши акс этган видеони эълон қилган эди. Унда фаоллар Исроилнинг Ашдод портида тиз чўктириб қўйилган, қўллари орқага боғланган ва бошларини пастга эгиб турган ҳолда кўрсатилган. Бен-Гвир эса уларнинг ёнида юриб, иброний тилида: “Исроилга хуш келибсиз, бу ерда хўжайин бизмиз”, деб бақирган.
У видеога “Терроризм тарафдорларини биз шундай кутиб оламиз” деган изоҳ қолдирган.
Европа Иттифоқи ва АҚШ бу ҳолатни кескин қоралаган. Европа Иттифоқи ташқи сиёсат хизмати вакили Ануар ал-Ануний бу муносабатни “мутлақо қабул қилиб бўлмайди” деб атаган ва Исроилни халқаро ҳуқуқ нормаларига қатъий риоя қилишга ҳамда ҳибсга олинганларни озод қилишга чақирган.
Жорий йилнинг 20 май куни Италия, Франция, Канада, Нидерландия, Бельгия ва Португалия каби бир қатор Ғарб давлатлари Исроил элчиларини ташқи ишлар вазирликларига чақиртирган. Испания эса Исроилнинг Мадриддаги элчиси йўқлиги сабабли фақат вақтинчалик вакилни чақирган.
