Ўзбекистон U-17 терма жамоаси бош мураббийи сифатида Осиё чемпионлигини қўлга киритган, Қатарда ўтган ўсмирлар ўртасидаги Жаҳон чемпионати 1/8 финалига қадар етиб борган Исломбек Исмоилов Фарғонанинг “Нефтчи” клуби бош мураббийи айланди. Бу ҳақда Фарғона вилояти ҳокимлиги матбуот хизмати хабар берди.
Унга кўра, 33 ёшли мутахассис жамоадан кетган қирғизистонлик Виталий Левченконинг ўрнини эгаллайди.
“Марғилон шаҳрида туғилган Исломбек Исмоилов ёш бўлишига қарамай, миллий футболимизда сезиларли натижаларга эришиб, мураббийлик соҳасида энг истиқболли кадрлардан бири сифатида танилган. У бошқарган U-17 терма жамоаси замонавий ўйин услуби, интизом ва характер билан мамлакатимиз шарафини муносиб ҳимоя қилди”, дейдилади ҳокимлик хабарида.
Шунингдек, Исмоилов бошчилигидаги “Нефтчи”га чемпионликни сақлаб қолиш ва мустаҳкамлаш, Элит Осиё Чемпионлар Лигасида муваффақиятли иштирок этиш, жамоанинг рақобатбардош ва узлуксиз ривожини таъминлаш вазифалари қўйилди.
Маълумот учун, Исломбек Исмоилов фаолияти давомида Фарғонанинг “Ёзёвон” ҳамда “Турон” клубларида фаолият олиб борган. Шунингдек, у 2022-йилдан 2025-йилга қадар Ўзбекистон ўсмирлар терма жамоаси устози сифатида ишлади.
