Президентнинг тегишли фармонига асосан 2026 йил 1 январдан бошлаб қурилиш ишларида назорат ва мониторинг механизмларига айрим ўзгартиришлар киритилади. Бу ҳақда Адлия вазирлиги хабар қилди.
Ушбу санадан бошлаб миллий норматив ҳужжатларга номутаносиб бўлган қисмлар учун компенсацияловчи чораларни таъминлаш бўйича махсус техник шартлар асосида ишлаб чиқилган лойиҳа ҳужжатларини экспертизадан ўтказиш фақат “Шаҳарсозлик ҳужжатларини экспертиза қилиш республика маркази” давлат муассасаси томонидан амалга оширилади.
Объектларнинг зилзилабардошлиги бўйича илмий ҳамда лойиҳа ҳужжатларининг смета қисмидан ташқари шаҳарсозлик ҳужжатлари экспертизаси хулосаларини тавсиявий мазмунда бериш амалиёти тугатилади ҳамда салбий хулосалар лойиҳа ташкилотининг “Шаффоф қурилиш” ахборот тизимида рейтинг баллари камайишига асос бўлади.
Бундан ташқари, қурилиши бошланган кўп квартирали уй-жойларга қўшимча қават қўшиш, баландлигини ошириш учун шаҳарсозлик ҳужжатларини ишлаб чиқиш, тегишли архитектура-шаҳарсозлик кенгашлари томонидан кўриб чиқиш, экспертизадан ва қайта рўйхатдан ўтказиш тақиқланади.
Қурилиш ва уй-жой коммунал хўжалиги вазирлиги томонидан ноқонуний қурилмаларни буздириш ишлари нархи ҳар йил учун алоҳида белгилаб борилади.
