Тошкент шаҳри Олмазор туманидаги хусусий боғчалардан бирида беш ёшли тарбияланувчига нисбатан куч ишлатилгани юзасидан суд ҳукми чиқарилди. Ҳолат бўйича тергов-суриштирув ишлари олиб борилиб, иш жиноят ишлари бўйича Олмазор туман судида кўриб чиқилди.
Маълум қилинишича, кузатув камералари ёзувлари ўрганилганда тарбиячи Елена исмли аёл вояга етмаган болага тан жароҳати етказгани аниқланган. Боланинг онаси видеони кўргач, 102 хизматига мурожаат қилганини, фарзанди ҳозирда шифокорлар назоратида даволанаётганини билдирган. Унинг сўзларига кўра, бола электрофорез, массаж ва психолог кўригидан ўтказилмоқда.
Тарбиячи судда айбини тан олиб, болани бир неча марта уриб, силтагани ва бурнидан қон кетганини билдирган ҳамда узр сўраган. Суд қарорига кўра, у Маъмурий жавобгарлик тўғрисидаги кодекснинг 52-моддаси 2-қисми билан айбли деб топилиб, базавий ҳисоблаш миқдорининг уч баравари — 1 миллион 236 минг сўм жаримага тортилди.
