Украина президенти Владимир Зеленский 4 июнь куни Россия президенти Владимир Путинга очиқ хат ёзди. Унда давлат раҳбари Киев урушни тўғридан тўғри музокаралар орқали якунлашга тайёрлигини билдирди. Бу ҳақда Украина президентининг расмий сайтида эълон қилинди.
Зеленскийнинг қайд этишича, томонлар ўртасидаги эҳтимолий учрашув Москва ёки Киевда бўлиб ўтиши шарт эмас. Уруш ва тинчлик масалаларида анъанавий равишда дипломатик ташаббус кўрсатадиган давлатлар музокаралар майдони сифатида кўриб чиқилиши мумкин. Булар қаторига Швейцария, Туркия ёки айрим араб давлатлари киради.
More stories“Ҳозирги фронт чизиғи дипломатик жараён бошланиши керак бўлган бошланғич нуқтадир”, деб таъкидлади президент.
Унинг сўзларига кўра, Украина музокаралар давомида ўт очишни бутунлай тўхтатишга тайёр. Шунингдек, у асирларни “барчани барчага” тамойили бўйича алмашишга рози. Зеленский жанглар пайтида ўғирлаб кетилган тинч аҳоли вакиллари ва болаларни қайтаришни таъминлашга ҳам тайёрлигини билдирди.
Украина президенти ушбу жараёнга АҚШ ва Европа давлатлари ҳам жалб этилиши кераклигини айтди. Улар хавфсизлик кафолатларини бера оладиган томонлар сифатида иштирок этиши лозим.
Мулоқот таклифи
Зеленский Путинга учрашишни ва бунинг учун аниқ санани белгилашни таклиф қилди.
“Биз украиналиклар ва россияликларнинг барча келгуси авлодлари учун келажак қандай бўлишини аниқлаб олишимиз керак. Агар сиз шахсан бу урушни тугатиш вақти келгани ҳақидаги фикрга келмасангиз, Украина ўз мавжудлиги учун курашни давом эттиради. Бизни қўллаб-қувватлайдиганлар топилади. Аммо сиз ҳам Россиянинг эмас, балки ўз мавжудлигингиз учун анча қаттиқроқ курашишингизга тўғри келади. Бу эса менинг ёки Украинанинг таҳдиди эмас.
Булар сиз яхши биладиган Россия тарихининг фактларидир: Россия чарчаганида ўзгаришлар юз беради. Биз бундай чарчоқ устида ишлай оламиз. Сиз ўз урушингизни тўхтатишингиз мумкин. Бу уруш ҳаётдан олиб кетган барчанинг хотираси мангу бўлсин. Украинага шон-шарафлар бўлсин!” дея якунланади мактуб.
