Қирғизистон Иссиқкўлдаги курорт объектларини Қозоғистонга 49 йилга ижарага беради. Иккала давлат парламенти тегишли келишувни ратификация қилган. Бу ҳақда Инбусинесс.кг хабар берди.
Маълум қилинишича, гап қарийб 59 гектар ер майдонини узоқ муддатли ижарага бериш ҳақида бормоқда. Бу Иссиқкўлдаги тўртта объект — “Қозоғистон” санаторийси, “Самал” дам олиш уйи, “Университет” оромгоҳи ва “Олимп” спорт марказига тааллуқли. Улар жойлашган ер майдонлари Қозоғистонга 49 йил муддатга ижарага берилади. Шу билан бирга, Бишкек мазкур участкалар тортиб олинмаслигини кафолатлайди.
Келишувга кўра, Қозоғистон объектларни 3–4 юлдузли даражагача модернизация қилиши ва уларни йил давомида ишлайдиган масканларга айлантириши керак. Бу ишларни якунлаш муддати 2029 йил охиригача узайтирилган. Лойиҳага инвесторларни жалб этишга рухсат берилади, бироқ ходимларнинг камида 80 фоизи Қирғизистон фуқаролари бўлиши шарт.
Ҳозирда янги «Қозоғистон» санаторийси қурилиши давом этмоқда. Уни 2026 йил охирида фойдаланишга топшириш режалаштирилган. Эски бинолар бузилади, фақат Динмуҳаммад Қўнаев (Қозоғистон Коммунистик партияси Марказий Қўмитасининг биринчи котиби)нинг дала ҳовлиси сақлаб қолинади ва музейга айлантирилади. Қолган объектлар бўйича реконструкция лойиҳалари тайёрланмоқда, молиялаштириш манбалари изланмоқда.
2026-йилда Қирғизистон ва Қозоғистон ўртасида бошқа муҳим ҳужжатлар ҳам кучга киради. Жумладан, Бишкек ва Остона элчихоналар эҳтиёжлари учун бир-бирига бино ва ер участкаларини бепул фойдаланишга беради. Остонадаги Қирғизистон элчихонасининг эски биноси бузилади, унинг ўрнига дипломатик миссиянинг янги биноси қурилади.
- Элчихоналар эҳтиёжлари учун бино ва ер участкаларини ўзаро беғараз тақдим этиш тўғрисидаги илк битим 2005 йил 10 августда Бишкекда имзоланган эди. Қирғизистон томони уни 2007-йилда, Қозоғистон томони эса 2011-йилда ратификация қилган. 2025 йил 22 августда имзоланган янги битим 2005-йилги шартномани янгилайди.
Эски келишувга кўра, Қирғизистон томони Қозоғистонга 49 йил муддатга умумий майдони 531,66 квадрат метр бўлган 17-сонли коттеж ва Бишкек шаҳридаги “Ала-Арча” турар-жой шаҳарчасидан 0,17 гектар ер участкасини (қурилиш учун) бепул фойдаланишга берган. Эски келишувда кўрсатилган бино ҳозирда Қозоғистон элчисининг қароргоҳи сифатида фойдаланилмоқда. Бунинг эвазига Қозоғистон Қирғизистонга анча катта ҳажмдаги мулк беради:
- Остонада 0,7412 гектар ер участкаси (унда Қирғизистон элчихонасининг янги биноси қурилади);
- Остонада 1267,8 квадрат метр майдонга эга бино ва 0,125 гектар ер участкаси.
Ҳозир элчихона вақтинча ушбу бинода фаолият юритмоқда. Янги бино қуриб битказилгач, мазкур бино элчининг қароргоҳи сифатида фойдаланилади.
