АҚШ Исроилнинг Ғазо секторига туташ Отеф-Азза ҳудудида йирик ҳарбий база қуришни режалаштирмоқда. Бу ҳақда Исроилнинг Шомрим суриштирув журналистикаси маркази хабар берди.
Манбаларга кўра, объект Ғазода ўт очишни тўхтатиш режимини назорат қилиш ва қўллаб-қувватлаш учун фаолият юритадиган халқаро кучлар жойлашувига мўлжалланган. База бир неча минг аскарни сиғдира олади, қурилиш қиймати эса тахминан 500 миллион долларга баҳоланмоқда.
Сўнгги ҳафталарда АҚШ вакиллари база қурилиши бўйича Исроил ҳукумати билан фаол музокаралар олиб борган. Ҳозирда жойлашув учун эҳтимолий майдонларни ўрганиш бошланган. Исроил ҳарбий манбалари бу ташаббусни “АҚШнинг минтақадаги сиёсатида муҳим ўзгариш” деб атаган.
Журналистларнинг қайд этишича, бундай йирик лойиҳа АҚШнинг ўзида ҳам сиёсий баҳс-мунозараларни келтириб чиқариши мумкин. Чунки Республикачилар партиясининг бир қисми хориждаги ҳарбий иштирокни кенгайтиришга қарши чиқмоқда. Шу пайтгача АҚШ ҳарбийларининг Исроилдаги мавжудлиги чекланган эди.
Ўт очишни тўхтатиш тўғрисидаги келишувдан сўнг АҚШнинг 200 га яқин аскари Исроилнинг Кирят-Гат шаҳридаги Марказий мувофиқлаштириш маркази (CМCC) базасига жойлаштирилган. Уруш даврида эса АҚШ Исроилга Эрон ҳужумларини қайтаришда қўлланган THAAD ҳаво мудофаа тизимини ҳам юборган.
Янги база лойиҳаси Исроилнинг Ғазодаги ҳаракат эркинлигини, айниқса гуманитар ёрдамни тақсимлаш масаласида, янада чекловчи қадам сифатида баҳоланмоқда. Хабарларга кўра, АҚШнинг CМCC маркази бу жараённи тўлиқ ўз назоратига олиши кутилмоқда. Исроилнинг COGAT агентлиги эса фақат ёрдамчи вазифаларни бажаради.
