АҚШ президенти Дональд Трамп “Ғазони барқарорлаштириш режаси”нинг иккинчи босқичи доирасида анклав учун янги бошқарув моделини тақдим этишга тайёрланмоқда. Axios манбаларига кўра, ушбу ташаббус Рождествогача эълон қилиниши мумкин.
Нашрнинг жараён билан бевосита шуғулланаётган бир нечта манбаларга таяниб ёзишича, биринчи босқичнинг асосий шарти бажарилган. Хусусан, ҲАМАС ихтиёрида асирликда сақланган деярли барча исроилликлар, жумладан, жасадлар яҳудий давлатига топширилган.
Исроил делегацияси 4 декабрь, пайшанба куни Қатар ҳамда Миср воситачилари билан учрашиб, Ғазода сақланаётган охирги исроиликнинг жасадини қайтариш масаласини муҳокама қилган. Манбага кўра, гап Ран Гвили ҳақида боряпти.
Трамп маъмурияти урушнинг қайта авж олишига йўл қўймаслик учун тинчлик жараёнининг иккинчи босқичига тезроқ ўтишни режа қилган. Нашрнинг қайд этишича, оташкесим эълон қилинганидан буён Исроил томони сулҳни 500 мартадан ортиқ бузиб, 366 нафар фаластинликни ўлдирган.
Дональд Трамп таклиф этган тинчлик режасидан сўнг Исроил Ғазога икки йил давом этган ҳужумларини тўхтатди. Сулҳнинг биринчи босқичи доирасида ҲАМАС ўз ихтиёридаги барча исроилликлар, жумладан, жасадларни қайтариб берди. Энди томонлар режанинг иккинчи босқичи устида ишламоқда. Унга мувофиқ Исроил Ғазодан қўшинларининг катта қисмини олиб чиқади. Анклавга Халқаро барқарорлаштириш кучлари жойлаштирилиб, янги бошқарув тизими жорий этилади.
Режага биноан Ғазони менежмент ёки бизнес тажрибасига эга бўлган фаластинлик технократлардан иборат ҳукумат бошқаради. Аммо бу кенгашга ҲАМАС билан алоқада бўлганлар олинмайди. Исроил бош вазири Биньямин Нетаньяху йил якунига қадар Трамп билан учрашиб, Ғаза келишувининг кейинги босқичини муҳокама қилиши кутилмоқда.
