Centrum Air авиакомпаниясига тегишли самолётда юзага келган техник носозлик туфайли Қозон–Тошкент йўналиши бўйича учиши керак бўлган рейс 27 соатга кечиктирилди. Оқибатда 200 дан ортиқ йўловчи Қозон халқаро аэропорти ҳудудида қолиб кетди. Бу ҳақда авиакомпания ўзинг расмий Telegram саҳифасида хабар берди.
Қайд этилишича, рейс 21 декабрь куни маҳаллий вақт билан соат 09:30 да амалга оширилиши белгиланган, бироқ техник муаммо сабаб парвоз бир неча бор ортга сурилган. Хусусан, якшанба, 21 декабрь куни рейс вақти камида тўрт марта ўзгартирилган, аввал 10:30 га, кейин 12:00 ва 15:00 га қолдирилган. Охир-оқибат парвоз 22 декабрь кунига кўчирилган.
Кун давомида йўловчиларга аниқ ва барқарор маълумот берилмаган. Дастлаб рейс қолдирилгани эълон қилинган, кейин эса йўловчиларга багажни олиб кетиш ва билет пули 30 кун ичида қайтарилиши мумкинлиги айтилган. Кечга бориб эса самолёт учиши мумкинлиги билдирилган.
Centrum Air’нинг Қозон аэропортидаги вакилига кўра, самолёт ғилдирагида техник носозлик аниқланган. Уни алмаштириш кечга қадар давом этган. Кейинчалик экипаж аъзоларининг дам олиши зарурлиги сабаб рейс эрталабга қолдирилган.
Бироқ 22 декабрь куни соат 07:30 га белгиланган рейс ҳам ўз вақтида учмаган. Йўловчилар соат 09:20 да самолёт бортига чиқарилган ва у ерда яна уч соатдан ортиқ вақт кутишга мажбур бўлган. Авиакомпания вакиллари бу ҳолатни Россия томони парвозга рухсат бермаётгани билан изоҳлаган.
Натижада 214 нафар йўловчи 21 декабрь соат 09:00 дан 22 декабрь 12:30 га қадар – жами 27 соатдан ортиқ вақт давомида аэропортда қолиб кетган. Маълумотларга кўра, самолёт 22 декабрь куни тушдан кейин парвоз қилган.
Йўловчиларга 21 декабрь кечқурун меҳмонхона таклиф қилинган. Бироқ кўпчилик бунга рози бўлмаган.
Centrum Air авиакомпанияси Telegram-канали орқали дастлаб рейс “техник сабабларга кўра соат 15:00 га қолдирилгани”ни маълум қилган. Кейинроқ эса Қозон аэропортидаги вазият юзасидан расмий баёнот бериб, йўловчиларни қўллаб-қувватлаш чоралари кўрилаётганини билдирган.
Компаниянинг маълум қилишича, йўловчиларга сув ва иссиқ овқат тақдим этилган, 214 нафар йўловчини меҳмонхоналарга жойлаштириш учун аризалар юборилган. Меҳмонхонага жойлашишни истаганлар “Три А” ва “Амакс” меҳмонхоналарига йўналтирилиши айтилган.
Самолёт ғилдирагини алмаштириш жараёни Россияга нисбатан жорий этилган санкциялар сабаб қийин кечган ва кўп вақт олган.
Компенсация сифатида авиакомпания йўловчиларга кейинги рейслар учун 25 фоизлик чегирма берувчи промокод, бепул ўриндиқ танлаш ва қўшимча багаж ҳуқуқини таклиф қилган.
