Фарғонада Россия фуқароларининг катта миқдордаги пул маблағларини фирибгарлик йўли билан ўзлаштирган уюшган жиноий гуруҳ аъзоларига жазо тайинланди. Бу ҳақда Давлат хавфсизлик хизмати хабар берди.
Уюшган жиноий гуруҳ фаолияти ДХХнинг Фарғона вилояти бўйича бошқармаси ва бошқа ҳуқуқни муҳофаза қилувчи идоралар ҳамкорлигида олиб борилган тезкор-қидирув тадбирлари натижасида фош қилинган.
Маълум қилинишича, Фарғона шаҳрида яшовчи 40 ёшли фуқаро раҳбарлик қилган, жами 34 кишидан иборат жиноий гуруҳ Фарғона ва Тошкент шаҳарларида биноларни ижарага олиб, Call марказлар ниқоби остида фаолият юритган. Улар ахборот технологиялари ёрдамида Россияда дори воситалари ҳамда биологик фаол қўшимчалар савдоси билан шуғулланувчи ташкилотларнинг 70 мингдан ортиқ мижози тўғрисидаги маълумотларни қўлга киритган.
Сўнгра бўлғуси ўлжалари билан қай тарзда муомала қилиш бўйича ўргатилган операторлар SIP телефония ва Зоипер иловалари орқали асосан кекса ёшдагиларга қўнғироқ қилиб, ўзларини ҳуқуқни муҳофаза қилувчи органлар ва банк ходимлари сифатида таништириб, гўёки компания томонидан сифатсиз дори воситалари ва биологик фаол қўшимчалар сотилганини таъкидлаган ҳолда, мижозларга 500 мингдан 580 минг рубльгача миқдорда компенсация тўлаб берилишини айтган. Бунинг учун эса фуқаролар 5 мингдан 20 минг рубльгача миқдорда солиқ тўлашлари кераклигига ишонтирилган.
Натижада жабрланувчилар жиноий гуруҳ аъзолари томонидан тақдим этилган турли банк пластик карталарига жами 9 миллион 599 минг 561 рубль миқдоридаги пул маблағларини ўтказиб берган.
Шунингдек, жиноий гуруҳнинг 3 нафар аъзоси криптовалюталар савдосини амалга ошириш ҳуқуқини берувчи лицензия олмасдан, “Ўзбекистон Республикасида криптобиржалар фаолиятини ташкил этиш чора-тадбирлари тўғрисида”ги президент қарори талабларига зид равишда жами 470 минг АҚШ долларига яқин криптоактивлар айланмасини амалга оширган.
Жиноят ишлари бўйича Ёзёвон тумани суди томонидан уюшган жиноий гуруҳ аъзолари тегишлилиги бўйича Жиноят кодексининг 168 (фирибгарлик), 243 (жиноий фаолиятдан олинган даромадларни легаллаштириш), 278-7 (телекоммуникация тармоғидан қонунга хилоф равишда (рухсатсиз) фойдаланиш) ва 278-8-моддалари (криптоактивлар айланмаси соҳасидаги қонунчиликни бузиш) билан айбли деб топилиб, уларнинг 21 нафарига 3 йил 6 ойдан 9 йил 6 ой муддатгача озодликдан маҳрум этиш жазолари тайинланди. Қолган 13 нафарига нисбатан 4 йил 3 ойдан 4 йил 6 ойгача муддатга озодликни чеклаш жазоси белгиланиб, жарималар қўлланди. Жабрланувчиларга етказилган моддий зарар эса ундириладиган бўлди.
