Ўзбекистонда жиноий тўдалар фаолиятига чек қўйилади. Президент Шавкат Мирзиёев 26 декабрь куни Олий Мажлис ва Ўзбекистон халқига қилган мурожаатномасида улар фаолиятига нисбатан қатъий ва очиқ муносабат билдирди.
Давлат раҳбари сўнгги пайтларда ўзини қонундан устун қўйган, тадбиркорларга босим қилиб, уларнинг бизнесини эгаллаб олишга ҳаракат қилаётган, иқтисодиётга жиддий путур етказадиган мураккаб молиявий жиноятларни содир этаётган, ўзини “қози” деб ҳисоблаб, одамлар ўртасидаги олди-берди масалаларни ҳал қилиб юрган айрим жиноий тўдалар кузатилаётгани айтди.
Осон пул топиш илинжида айрим спортчилар ҳам бундай жиноий тўдаларга қўшилиб қолаётганини билдирди. Ўзбекистон фуқароларидан иборат жиноий гуруҳлар айрим чет давлатларда ҳам мавжудлиги мамлакат халқаро обрўсига салбий таъсир кўрсатаётганини таъкидлади.
“Ҳамма эшитиб олсин: бундай жиноий тўдалар фаолиятига чек қўйишга куч-қудратимиз етади ва буни албатта қиламиз!”, деди давлат раҳбари.
Ўзбекистонда фуқаролар, тадбиркорлар ва инвесторларни ҳар қандай вазиятда ҳам ишончли ҳимоя қиладиган давлат, Конституция, қонунлар борлигини таъкидлади.
Ўзбекистонда 20 ноябрдан 20 декабргача “Хавфсиз ва соғлом юрт” кенг қамровли тезкор-профилактик ойлиги ўтказилганди. Ойлик давомида уюшган жиноятчиликка қарши курашиш йўналишида олиб борилган тадбирларда жами 1918 та жиноят аниқланди. Хусусан, Сурхондарё вилояти Денов туманида турли йўллар билан фуқароларга таҳдид қилиб, моддий бойликларни зўрлик ишлатиб тортиб олиш билан шуғулланаётган жиноий гуруҳ қўлга олинди.
